Стихови и плакати во чест на Сезeр
Во рамките на актуелната меѓународна манифестација посветена на книгата „Читаме и празнуваме“ што се одржува во над 150 земји во светот, вчера во во НУБ „Св. Климент Охридски“ беше отворена изложба на плакати и е одржано литературното читање во чест на истакнатиот франкофонски поет и политичар од островот Мартиник, Еме Сезер, кој почина на 17 април годинава. Манифестацијата коинцидира со актуелното одржување на Самитот на франкофонските земји (Квебек, Канада), каде свои претставници има и Македонија како земја членка.
За ликот и делото на Еме Сезер (1913 -2008), омаж одржа проф. Лилјана Тодорова, нарекувајќи го авторот поетски гениј и драмски писател на франкофонската литература на 20 век и политичар. Тој, 56 години од својот животен век бил градоначалник на Фор - де Франс (1945 -2001), 48 години, пратеник во Националното собрание на Франција(1945-1993).
„Паралелно со тие активности на хуманист, решителен антиколонијалист, промотор на африканската самосвојност и култура и на африканската составка на идентитетот на своите Антилци, Сезер ќе развие едно импозантно книжевно дело на поет, есеист и драмски писател “- рече меѓудругото Тодорова, говорејќи со неизмерна почит кон неговиот лик и дело. Како хуманист и борец за слободен развој на културите вредности на своите сонародници и за признавање на нивниот идентитет и јазик од кој црпел бројни африканизми, Сезар стекнал голема слава и во 1982 бил награден со престижната француска „Гран При национал“, за својот поетски опус. (К.Б.) |
