Американците навредени од Карзаи

Преку американскиот амбасадор стигна предупредување дека критиките на Запад не се добредојдени

Американскиот амбасадор во Кабул, Карл Ајкенбери, испрати прикриено предупредување до авганистанскиот претседател Карзаи дека неговото критикување на Запад би можело да го загрози останувањето на американските сили и финансиската помош што се од клучно значење за опстанок на авганистанската влада.

Ајкенбери во својот говор на авганистанскиот универзитет Херат, рече дека коментарите „на некои авганистански лидери“ ги гледа како „штетни и несоодветни“, јави Ројтерс. Иако Карзаи не беше директно спомнат, неговиот говор очигледно е конципиран како одговор на низата критики на западните сили во Авганистан и дипломатските притисоци што во последно време ги изнесуваше авганистанскиот претседател. Така Карзаи неодамна предупреди дека странските војници ризикуваат да бидат видени како окупатори поради многубројните колатерални цивилни жртви што ги предизвикуваат. Освен тоа, го обвини Запад дека ја загадува неговата земја со употреба на оружја што содржат токсични хемикалии.

Поради тие коментари Ајкенбери се најде навреден: „Кога ќе слушнеме дека не' нарекуваат окупатори, нашата гордост е повредена, па поради тоа ги губиме мотивот и инспирацијата да продолжиме“.

Иако се' уште не е познато дали американската војска ќе остане во Авганистан и по завршувањето на годинава, постојат индиции дека авганистанската влада „ќе ги повика“ уште малку да им помогнат во стабилизирањето на земјата. Се предвидува дека авганистанските власти ќе ја воспостават целосната контрола врз безбедноста дури во 2014 година, па Ајкенбери предупреди дека американската помош на Авганистан нема да биде бесконечна и безрезервна доколку се продолжи со потценување на американските жртви, во вид пари и животи на војници. „Во момент кога вашите лидери мислат дека правиме повеќе штета отколку корист, а особено со оглед на тешката состојба на нашата економија, американскиот народ ќе сака враќање на своите војници дома“, заклучи американскиот амбасадор. (Индекс.хр)