Медведев нема да му биде ривал на Путин

Натпреварот меѓу нив за иден претседател на Русија би можел „да биде опасен“

Рускиот претседател Дмитриј Медведев изјави дека „му е тешко да замисли“ оти тој и премиерот Владимир Путин меѓусебно ќе се натпреваруваат на претседателските избори закажани за следната година. Натпреварот меѓу нив, вели тој, би можел „да биде опасен“.

Но, зборувајќи за „Фајненшел тајмс“, Медведев одби да потврди дали ќе се кандидира за втор мандат. Тој пред новинарите изјави дека „е апсолутно несоодветно“ тоа дека постои се' поголемо ривалство меѓу нив.

Коментарите на претседателот беа полни со мешани пораки, јавува дописникот на Би-Би-Си од Москва. На прашањето за време на интервјуто дали има намера да се кандидира за втор мандат во Кремљ, рускиот претседател рече: „Секој лидер што ја извршува функцијата претседател едноставно мора да се кандидира“. Но, додаде - друго прашање е дали тој „ќе ја донесе оваа одлука или не“.

Тој изгледа ја отфрли можноста да се кандидира против Путин ако премиерот се одлучи да поднесе своја кандидатура. „Владимир Путин и јас - Владимир Путин е мој колега и стар пријател - претставува, во голема мера, една и иста политичка сила. И затоа натпреварот меѓу нас би можел да биде штетен за (нашите) задачи и цели“, изјави тој за „Фајненшел тајмс“.

Медведев ги повтори своите ветувања за модернизација на земјата и изјави дека ова е зависно од проширување на политичката конкуренција. Тој предупреди дека „во отсуство на политичка конкуренција, основите на пазарната економија почнуваат да исчезнуваат“. Навести ревидирање на некои политички централизации и државна контрола на економијата што беше ставена на сила во времето на Путин. „Во некои земји постои успешна коегзистенција на економии ориентирани кон пазарот и ограничена политичка конкуренција“, рече тој. „Тоа не е за нас“.

Во последните неколку месеци претседателот Медведев беше покритичен кон неговиот премиер, јавува дописникот на Би-Би-Си во Москва. Меѓутоа, додава дека Путин е тој што во голема мера се смета за најмоќен политичар во Русија, и повеќето аналитичари веруваат дека Путин ќе биде тој што ќе треба да одлучи кој од нив ќе ја претставува партијата на власт на претседателските избори закажани за следната година. (Би-Би-Си)