Пропаднаа уставните измени

Премиерот преку писмо им соопшти на лидерите на СДСМ, ДУИ и на НД дека се прекинува процедурата за уставни измени

Уставните измени ќе почекаат подобри времиња, пресече вчера премиерот Никола Груевски. Тој во писмото што ги упати до лидерите на СДСМ, Бранко Црвенковски, ДУИ, Али Ахмети и на Нова демократија, Имер Селмани, ги обвини партиите дека немале интерес да се изврши предложената промена што ја иницираше ВМРО-ДПМНЕ.

„За жал, при иницирањето на постапката за измена на Уставот на Република Македонија, добив впечаток дека политичките партии што беа повикани на лидерската средба, на која требаше да се претстави идејата и да се постигне согласност по однос на ова прашање, немаат интерес во овој момент да се изврши предложената промена“, се вели во писмото на премиерот Груевски.

Притоа, се додава дека за него останале непознати мотивите за неприфаќањето на предлогот на ВМРО-ДПМНЕ, чиј лидер е Груевски и дека може само да претпоставува. Истовремено, премиерот вели дека за него било несфатливо како „партиите, кои постојано декларативно се залагаат за реформа во правосудниот систем, сега конкретно на дело не сакаат да го остварат тоа“.

Уставните измени беа иницирани од страна на ВМРО-ДПМНЕ, и тоа во делот на Судскиот совет. На овој предлог се надоврзаа и предлозите на СДСМ за донесување амандман со кој нема да застаруваат кривичните дела поврзани со приватизацијата и барањето на НД и на ДУИ за одлучување според Бадентеровиот принцип во Уставниот суд и при донесување на државниот буџет. За таа цел, беше формирана и Работната група составена од претставници на четирите партии, но во временската рамка од две недели што беше договорена, не се дојде до компромис.

Груевски во вчерашното писмо обвинува дека сериозната и државничка работа на пристапување кон уставни измени била претворена во симулација на простор за емитирање политички ставови, со цел краткорочно подобрување на партиските рејтинзи, меѓу другото и преку отворање прашања што навлегуваат во сферата на меѓуетничките односи, а не интересот на државата.

„Жалам што процесот беше комплетно дезавуиран и на тој начин имаше обид за суштинска девалвација на проект што има цел подобрување на системот на една од властите во државата“, вели Груевски во писмото до лидерите на СДСМ, ДУИ и на НД.

На крајот, тој заклучува дека анализирајќи ги сите аспекти, увидел дека во моментално не постои атмосфера за реализација на уставните измени, па затоа процедурата за уставните измени се прекинува, а иницијативата за уставни измени ќе ја обнови ВМРО-ДПМНЕ кога ќе проценат дека се создадени услови за таква активност. (Д.Р.)