Битолската млекарница ќе извезува на рускиот пазар

ИМБ увезува млеко поради недостиг од домашно

БИТОЛА - Производите на ИМБ, особено оние од овчо млеко, наскоро ќе се најдат и на рускиот пазар, најавија од битолската млекарница. „Што се однесува до увозот на млеко и млечни производи што го направи ИМБ во изминатиот период, тоа било поради недостиг од домашно сурово млеко“, тврди генералниот директор Роко Водопија. Според него, тоа се само ситуации од сезонски карактер, бидејќи овие денови пораснал откупот на сурово млеко, па ИМБ дневно собира и по 120 тони млеко од своите кооперанти.

„Увозот на битолско млеко под наш бренд, а од други земји е околу три отсто од нашите приходи. Тоа не е многу значајно, бидејќи не може да влијае на состојбите во сточарството во Македонија. Наша стратегија е домашно производство, но се' што не можеме да произведеме овде ќе увеземе и не можеме да го спречиме тоа“, нагласи Водопија.

Менаџментот на млекарницата смета дека е потребно инвестирање во македонските фарми, пред се', во кредити за купување нови грла добиток, опрема за молзење... „Не веруваме дека ќе дојде до ситуација фармерите да го истураат млекото. Фармерите нема да го направат тоа“, вели Водопија. Наспроти поплаките од фармерите дека цената на суровото млеко паднала на неверојатни 8 денари од литар, од ИМБ тврдат дека цените пораснале и тоа повеќе од европскиот тренд.

„Цените варираат од 13 до 18 денари за литар во зависност од квалитетот. Но, цените што ги има сега ИМБ се поголеми од оние во Чешка, Полска и Германија. Но, она што се случуваше во 2008 година, кога литар сурово млеко беше 30 денари, повеќе не може да се случи, бидејќи тоа е нереално“, нагласи Предраг Цветковиќ од менаџментот на ИМБ. (А.Б.)