Пролонгиран рокот за конкурсот „Изрази се преку медиумите“

Матурантите што сакаат да учествуваат на конкурсот на Високата школа за новинарство и за односи со јавноста „Изрази се преку медиумите“ ќе можат своите идеи за најдобар матурски проект да ги испраќаат до 25 април. Еднонеделното пролонгирање на крајниот рок се должи на барањето на самите ученици поради обврските околу проектните задачи во училиштата.

Високата школа веќе втора година го организира овој конкурс, овој пат со тематика насочена против дискриминација по сите основи, поради што тој е насловен „Имам право да бидам различен“. Конкурсот е поддржан од Советот на Европа, Европскиот центар за новинарство и од медиумите „Утрински весник“, „Дневник“, „Вест“, „Нова Македонија“, телевизија Алсат-М и радио Канал 77.

Матурантите се натпреваруваат за најдобар медиумски продукт во четири категории: ТВ-прилог (доставуваат само идеја), видеоклип снимен со мобилен телефон или флип-камера, фотографија или постер. Најдобрите идеи се наградуваат со 10 целосни стипендии за насоката новинарство и 10 делумни стипендии од 1.100 евра за студирање на насоката корпоративни комуникации и односи со јавноста.