Словачки политичар бара план Б за откажување од еврото

БРИСЕЛ - Словачка, која минатата година се приклучи кон еврозоната, треба да има „план Б“ за враќање на нејзината национал��а валута, изјави спикерот на парламентот Ричард Сулик, во врска со фрустрациите околу начинот на кој еврозоната се справува со должничката криза. „Дојдено е времето Словачка да престане слепо да верува во она што го велат лидерите од еврозоната и да подготви план Б. Тоа е повторно воведување на словачката круна“, истакна Сулик во колумната објавена во деловниот дневен весник „Хосподарске новини“ во неделата. Тој додава: „Бидејќи ние сме премала земја за значително да влијаеме на дејствувањето на ЕУ, мора барем да ги заштитиме вредностите создадени од луѓето кои живеат во Словачка“.

Гледиштата на Сулик се одраз на поширокото незадоволство од одлуките што ги донесе еврозоната откако избувна грчката криза. Словачката централнодесничарска влада постојано ги повикуваше приватните инвеститори да ја почувствуваат болката од каква било спасувачка операција под закрила на еврозоната. Таа смета дека спасувањето на Грција е грешка поради која европските влади станаа заложник на финансиските пазари.

Парламентарниот спикер изјави дека е „неодговорно“ државите да ризикуваат финансиски проблеми на домашната сцена, преземајќи обврски од нивните задолжени колеги во согласност со Европскиот механизам за финансиска стабилност, привремено средство за спасување што беше договорено во мај, а сега обезбедува помош за Ирска. Тој, исто така, ја критикуваше Европската централна банка за нејзината политика на купување обврзници од земјите на ЕУ.

Словачкиот премиер Ивета Радикова и министерот за финансии Иван Миклош, брзо реагираа на коментарите на Сулик, кој, исто така, ја води помладата коалициска партија Слобода и солидарност, и е познато дека учествувал во воведувањето на рамниот данок во Словачка.

Во долгорочни рамки, предностите на еврото за словачката економија ги надминуваат неговите негативности, истакна портпаролот на Радикова за дневниот весник СМЕ: „Поради тоа ние преферираме решенија што се базираат на факти за екстремни сценарија“.

Според министерот за финансии: „Треба секогаш да бидеме подготвени за сите опции, но сега мора да се направи се' за зајакнување на еврото“. Трошоците и последиците од повторно воведување на круната би биле огромни, укажа тој.

Некои аналитичари ги опишаа коментарите на Сулик како опасни, истакнувајќи дека тие би можеле да влијаат на инвеститорите кои ги чуваат обврзниците на словачката влада, или размислуваат за инвестирање во земјата. Братислава треба да рефинансира околу осум милијарди евра од нејзиниот долг следната година, а политичарите кои создадоа неизвесност играат со оган, смета главниот аналитичар на Фолксбанк Словенско, Владимир Вано. (ЕУ Обсервер)