Бриселска веб-страница ќе го имитира „Викиликс“

Брисел - Охрабрен од успехот на „Викиликс“, белгиска веб-страница ветува дека ќе ги направи јавно достапни тајните на европските институции, пренесоа француските медиуми.

Веб-страницата brusselsleaks.cоm е создадена неделава во белгиската престолнина каде што се наоѓаат повеќето европски институции.

Засега тоа е само обична страница на англиски јазик. Во неa анонимните создавачи објаснуваат какви им се целите. Тие сакаат да го направат транспарентен процесот на донесување одлуки во европските институции и да откриваат кој за кого лобира.

Бриселската веб-страница нема намера да објавува тајни документи. Таа повеќе ќе се фокусира на приемот на вакви документи, ќе ја проверува нивната автентичност и потоа ќе ги лиферува меѓу медиумите и невладините организации. Страницата не прецизира дали објавувањето на документите ќе биде бесплатно или за соодветна цена.

Создавачите на brusselsleaks.com ветуваат дека првите документи, кои ќе бидат лиферувани во најскоро време, ќе се однесуваат на секторот за транспорт и за енергетика.

Веб-страницата, меѓутоа, нема да објавува никакви документи поврзани со личниот живот на луѓето, закани за нивната безбедност или кариера. (МИА)