Принцот на Непал на суд

КАТМАНДУ - Поранешниот престолонаследник на Непал, Парас Шах, ќе биде испрашан откако пукаше од своето оружје во одморалиште во џунглата, соопшти полицијата. Поранешниот наследник на сега поништениот трон, наводно, бил пијан и им се заканувал на роднините на заменик-премиерот, кои, исто така, престојувале таму. Триесет и деветгодишниот син на поранешниот крал Гјанендра не беше популарен меѓу Непалците поради плејбојскиот стил на живеење и што постојано беше под дејство на алкохол. Негов братучед уби деветмина роднини, вклучувајќи ги кралот и кралицата, пред да се самоубие во 2001 година. Во официјалната истрага се откри дека принцот Дипендра е виновен за кралскиот масакр што го шокираше Непал и светот. Оваа 240-години стара хинду монархија на хималајската држава беше отстранета од власта во 2008 година, откако поранешни маоистички бунтовници, кои водеа 10-годишно востание против државата, дојдоа на власт.

Полицијата во туристичкиот град Покара во западниот дел на Непал, каде што Шах моментно престојува, се подготвува да го испраша поранешниот принц. Началникот на полицијата, Кешап Адикари, за Би-Би-Си изјави дека ќе го притвори и ќе го однесе во Читван, каде што се случи инцидентот во неделата. (Би-Би-Си)