Со еден удар до три бода

Со голот на Кержаков во 8 мин., Русија ја совлада Македонија со 1:0, Наумоски промаши пенал во 74 мин.

Сашко Ѓ. Димовски

Еден удар им беше доволен на Русите да слават против Македонија со 1:0 за преземање на лидерската позиција во групата Б во квалификациите за ЕП 2012 во Полска и Украина. Го упатија во осмата минута, стрелаше Кержаков (Новески се чини можеше и мораше подобро да ја одработи ситуацијата) со кои однесоа големи три бода од Скопје кои, според играта во второто полувреме, за многумина не ги заслужија. Можеби свесно му овозможија простор за игра на домаќинот, можеби не, но факт е дека македонските репрезентативци беа подобри на тревникот во вторите 45 минути. Имавме игра, создадовме неколку шанси, неколку пати конкретно се заканивме, имавме и пенал меѓутоа не искористивме ништо од тоа. „Виновник“ е гостинскиот голман Игор Акинфеев кој бранеше се, го „прочита“ и Илчо Наумоски во 74 минута при изведување ��а ударот од белата точка и не ни дозволи да го прославиме првиот гол во дуелите со „зборнаја“. Досега одигравме три сметајќи го и оној завчера, првиот го загубивме со 2:0, вториот со 3:0 во кои не успеавме да реализираме два пенала (Игор Митрески не погоди во Москва на 8 септември во 2007 година во квалификациите за ЕП 2008). Но, по мечот се доби општ впечаток дека играчите не разочараа овојпат.

„Отсуствуваа неколку играчи, пред двомечот со Андора и Русија тимот беше и под психолошки стрес предизвикан од надворешен фактор, но мислам дека добро се справивме со тоа, одигравме добро, храбро, борбено. Затоа можам да им честитам на моите играчи кои овојпат ја немаа помошта од Пандев и Попов. За жал примивме гол во единствениот пропуст што го направивме“, истакна Мирсад Јонуз, селектор на Македонија, кој притоа не заборави да се заблагодари на поддршката од трибините.

„Иако загубивме публиката не' испрати со аплауз. Жалам што го немавме против Ерменија бидејќи ако го имавме сигурен сум дека ќе го добиевме тој меч“.

Македонија премногу резервирано влезе во мечот со Русија. Му оддаде голем респект на противникот и во воведните 15-тина минути нашите фудбалери изгледаа како да им се врзани нозете. Се чувствуваше стравот од евентуален висок пораз кај нив, но како минуваше времето се ослободуваа од притисокот и успеаја да создадат рамнотежа, за жал не успеаја да и' чепнат барем бод на „зборнаја“. Самите се свесни за пропуштената прилика, па затоа кај дел од нив забележливи беа солзи во очите. Наспроти нив, Дик Адвокат, селекторот Русија, со насмевка на лицето. Јасно му беше дека тука никому нема да му биде лесно, па и на неговата Русија (словачкиот селектор Владимир Веис порача дека за пласман на првите две места во групата ќе одлучуваат натпреварите во Скопје). Затоа не го криеше задоволството од триумфот.

„Најважно е дека победивме. Клучен момент беше што постигнавме гол во раната фаза од мечот. По водството моите фудбалери малку се опуштија, но за среќа се добро се заврши. Не беше лесно да се игра со Македонија вечерва. Домашната селекција одигра квалитетно и силно, создаваше прилики за гол во второто полувреме кои за наша среќа не ги искористи“, рече холандскиот стручњак на руската клупа.

Македонија - Русија 0:1

Полувреме: 0:1. Национална арена: „Филип Втори“ во Скопје. Гледачи: 14.000. Главен судија: Стефан Јохансон. Помошници: Стефан Витберг и Јоаким Флинк (сите тројца од Шведска). Жолти картони: Новески, Шиков (Македонија), Зирјанов, Анјуков (Русија). Стрелец: Кержаков во 8 минута.

Македонија: Нурединовски, Шиков, И. Митрески, Новески, Лазевски, Деспотовски (Георгиевски), Шумуликоски, Ѓуровски (Алими), Ибраими (Ристиќ), Наумоски. Селектор: Мирсад Јонуз.

Русија: Акинфеев, Анјуков, В. Березуцки, Игњашевич, Жирков, Широков, Денисов, Зирјанов, Џагоев (А. Березуцки), Аршавин (Бистров), Кержаков (Погребњак). Селектор: Дик Адвокат.

Група Б

Резултати, 4. коло: Македонија - Русија 0:1, Словачка - Република Ирска 1:1, Ерменија - Андора 4:0.

Табела

1. Русија 4 3 0 1 6:3 9

2. Р. Ирска 4 2 1 1 7:5 7

3. Ерменија 4 2 1 1 9:4 7

4. Словачка 4 2 1 1 4:4 7

5. Македонија 4 1 1 2 4:4 4

6. Андора 4 0 0 4 1:11 0

Идно коло (26.03.2011 год.): Република Ирска - Македонија, Ерменија - Русија, Андора - Словачка.