Спречен нов „Хејсел“ во Џенова

Српските хулигани го нападнаа голманот Стојковиќ, ги распараа мрежите и го прекинаа квалификацискиот меч со Италија

„Ова не сум го видел во својот живот“, кажа запрепастениот селектор на Италија, Џезаре Прандели, по грозните нереди што ги направија навивачите на Србија пред и за време на квалификацискиот меч со Италија во Џенова. Натпреварот беше прекинат во седмата минута. Тоа беше финалето на дивјачкиот поход на српските навивачи по Џенова, кој започна со доаѓањето на „делиите“ во италијанското пристанишно градче само со намера да го претепаат голманот Владимир Стојковиќ, поради неговиот „смртен грев“ што како играч кој порасна во Црвена звезда сега игра за Партизан.

Тоа за малку и ќе им успееше. Имено, пред мечот хулиганите успеаја да го сопрат автобусот со репрезентативците. Влегоа во автобусот и фрлија факел. Внатре се гореше, а Стојковиќ го спасија Жигиќ и Станковиќ. Колку Стојковиќ бил потресен зборува и Прандели.

„Влеговме во соблекувалната и го видовме голманот како буквално се тресе од страв. Човекот се престраши за животот. Не знаев за што се работи додека преведувачот не ми објасни дека Стојковиќ се сокрил во нашата соблекувална“.

Стојковиќ подоцна го замоли селекторот Петковиќ да не брани, а овој го послуша. „Засега не сакам за тоа да зборувам. Почекајте ова да помине“, кажа српскиот голман кој во кариерата бранеше за Нант, Витесе, Спортинг, Гетафе и Виган.

Вчера во јавноста се огласи и потресената мајка на Стојковиќ: „Многу сум згрижена за своето дете кое го испратив во Италија да ги брани боите на Србија, а не да го донесат во сандак, како што тоа го подготвиле навивачите на Црвена звезда (тие пред хотелот на репрезентацијата скандираа: Стојовиќ, Стојковиќ ти сакаме среќа, дрвен сандак, дрвен сандак и на него свеќа“). Не ја разбирам ниту нашата Федерација, која не ги послуша Италијанците кога бараа засилено обезбедување. Им благодарам на Жигиќ и на Станковиќ што ми го спасија детето“, изјави растревожената мајка Коса Стојковиќ.

Бојана, сопругата на голманот и манекенка, не знаела каков хорор преживува нејзиниот сопруг, бидејќи во тоа време била на модна ревија. Кога дознала во солзи побегнала од настанот и му се јавила на сопругот да дознае дали е добро.

Сето ова претходеше на дивеењето на српските хулигани на стадионот. Мечот по 35 минутно доцнење, сепак, започна, но само по неколку минути беше, дефинитивно, прекинат, откако беше фрлен првиот факел. Во почетокот место играчите на терен излегоа специјалците, беа подготвени и водените топови, но контакт меѓу полицијата и хулиганите немаше. Безредијата почнаа при интонирањето на химните. Еден од хулиганите со маичка на која пишуваше „Четници Север“ го запали албанското знаме, а неколкумина од нив со ножеви и клешти ја распараа заштитната мрежа зад голот.

Фудбалерите на Србија се обидоа да ги смират, аплудирајќи им со кренати три прсти, но не успеја во тоа. Италијанските медиуми го нападнаа Станковиќ, кој ги предводеше играчите во смирување на ситуацијата: „Тоа не беше аплауз за одобрување, само се обидовме да ги смириме“, се правдаше Станковиќ.

Како што кажавме, сето тоа траеше 35 минути, по што мечот почна. Италија дури и даде гол, ама и беше поништен поради офсајд.

Италијанските медиуми пишуваат дека Србија службено ќе го загуби мечот со 0:3 и пет меча ќе мора да игра без публика.