Лозарите протестираат поради ниската цена на грозјето
Откупните цени за грозјето од годинешната реколта што ги објави винарската визба „Повардарие” од Неготино, за лозарите од овој крај се неприфатливи. Откако оваа визба ги соопшти откупните цени, неповолната вест, како што велат лозарите, ги погодила како гром од ведро небо.
Тие вчера протестираа пред портите на визбата. Велат дека нема да дозволат ниту „Повардарие” , ниту која било друга визба да им го земе грозјето за без пари. За 19 шеќерни единици во килограм грозје од сортите „шардоне“, „совињон блан“ и „темјаника“, „Повардарие“ ќе плати 14 денари, а за „црн бургундец“ со исти шеќерни единици цената е 10 денари за килограм. Лозарите велат дека наместо да се зголеми цената на грозјето за 20 отсто, таа за толку е пониска споредено со ланските цени.
Од винарската визба ги информираа лозарите кои протестираа дека во тек е постапка за преземање на „Повардарие“ од „Вино жупа“.
„По преземањето на визбата и влезот на ’Вино жупа‘ од Александровац,Србија, новиот менаџерски тим ќе ве извести за намерите и плановите околу винското грозје” , се вели во соопштението што им беше поделено на новинарите и на лозарите. На ова лозарите прашаа тогаш која е гаранцијата дека „Вино жупа“ ќе го плати грозјето кое го откупува, доколку се' уште не е сопственик на „Повардарие“.
Лозарите бараат поддршка од сите државни институции во надминувањето на проблемот со откупната цена. Ако нема повисоки цени, лозарите се заканија дека, покрај млекото, низ улиците во земјава ќе потече и шира. (А.Д.) |
