Демир-Халк банка со дозвола за купување над 50 отсто од ИК банка
Гувернерот на Народната банка на Република Македонија и' даде согласност на Демир-Халк банка од Ротердам, Холандија, за стекнување над 50 отсто од вкупниот број акции на Извозна и кредитна банка АД Скопје. НБРМ соопшти дека трансакцијата за стекнување на акциите треба да се изврши во рок од 180 дена од денот на добивањето на согласноста од гувернерот.
Демир-Халк банка е деловна банка, која врз основа на дозвола од Централната банка на Холандија работи од 1992 година. Седумдесет отсто од акциите се во сопственост на финансиската холдинг- компанија ХЦБГ Холдинг БВ, а 30 проценти се во сопственост на Халк банка. Банката е со седиште во Ротердам, Холандија. Има филијали има во Холандија, Германија и Белгија, како и претставништво во Турција.
Согласно со ревидираните консолидирани финансиски извештаи за 2007 година банката има финансиски потенцијал од 1,9 милијарди евра, капитал од 211,6 милиони евра и финансиски резултат од 18,7 милиони евра. (МИА) |
