ССМ ќе штрајкува ако нема расправа за измените во Законот за работни односи
Синдикатот достави 13 амандмани до Собранието и инсистира да има демократска расправа за нив
Маја Томиќ
Сојузот на синдикатите на Македонија вчера побара средба со претседателот на Собранието, Трајко Велјаноски, за да се овозможи амандманска интервенција кај 13 члена во Предлог-законот за измени и дополнувања на Законот за работни односи на закажаната седница в понеделник.
„И минатата недела со допис побаравме од Велјаноски да ги достави 13-те амандмани до пратеничките групи на ВМРО-ДПМНЕ, ДУИ, ДПА, СДСМ, ЛДП. Законот за работни односи е устав за работниците, а неговото носење без расправа и консултација со социјалните партнери е непримерно за демократски држави“, истакна на вчерашната прес-конференција Драге Јовановски, претставник на Одделението за правни работи при ССМ.
Доколку в понеделник не се дискутира за амандманите, Јовановски најави оти ССМ повторно преку дијалог со Владата ќе побара расправа за нив, а ако и тоа не даде никакви резултати, ќе се искористат сите правни средства против државата, а доколку треба, ќе се организира и масовен штрајк на работниците.
За измените и дополнувањата во Законот за работни односи пратениците в понеделник треба да гласаат по трет пат. Парламентарното мнозинство законските измени досега ги изгласа во два наврата, во јули и во август, но претседателот Бранко Црвенковски го немаше потпишано указот за негово прогласување. Претходно ССМ побара од шефот на државата да не ги потпише изгласаните измени.
ССМ преку амандманите бара договорите за работа на определено време да бидат најмногу две години, а не пет, како што предлага Владата. Се инсистира на продолжување на досегашното законско решение со кое на работодавецот, доколку отпушти работник од деловни причини, му се забранува на негово место да вработи друг работник во рок од една година. Според ССМ, треба да остане и претходното решение со кое се утврдува на работникот да му се плаќа за работа во неделите. Треба да остане и решението во текот на цел месец работниците да може да работат ноќна смена само една недела. Според новите законски предлози, се овозможува работниците да работат ноќна смена и по десет години.
„Со предложените измени на ЗРО, и неделите се пресметуваат во деновите за одмор, со што се крати траењето на годишниот одмор. Значи, ќе има кратење на одморите за шест работни дена, што најмногу ќе ја погоди јавната администрација“, рече Јовановски.
Законот за работни односи,од проста причина што тој беше донесен без да се консултира Синдикатот на работниците.Сега,кога се знае дека без него не ќе може да мине,претставниците на работниците имаат свои несфатливи барања-работа на неодредено да биде скратена на 2 години,на пример,што им дава донекде сигурност дека побрзо,отколку за 5 години,да бидат вработени на неодредено време.Загрижени се и за дните за одмор.
Холандија имаше исто проблем со вработување,но Синдикатот прифати вработување на неколку часа во неколку дена во неделата.Така за сите имаше по нешто-барем да не одат со испружена рака по туристите.И сега Холандија е економски многу силна земја.А таа,тогаш непријатна вест на работниците им ја соопшти првиот синдикалец.И беше прифатено.не со радост,но
беше прифатео и применето
Нашата Влада ,дури и премиерот,често се во Холандија.Време е да се заинтересираат и за тоа како таа мала земја толку многу успеа со вработувањата,па дури вкључува и странци како стимул на економија
