Одбележан денот на Кирил и Методиј во Рим

Неговата светост папата Бенедикт 16 на аудиенцијата изрази надеж за скоро решавање на спорот со името на Република Македонија и истакна дека секој има право да го користи сопственото име

Снежана Калабакова


Државната делегација на Република Македонија, предводена од претседателот на Собранието, Трајко Велјаноски, е во неколкудневна посета на Рим, на традиционалното одбележување на манифестација „Македонија во чест на свети Кирил”. Претседателот Велјаноски денеска ќе се сретне со претседателот на италијанскиот парламент, Џанфранко Фини. Заменик-министерот за култура, Драган Недељковиќ, кој е дел од делегацијата, ќе оствари средба со претседателот на понтификалниот Совет за култура.

Делегацијата вчера присуствуваше на молебен на гробот на свети Кирил во базиликата „Сан Клементе”. Во рамките на културните содржини во комплексот „Сан Микеле“ беше презентирана монодрамата „Синови на сонцето“, во изведба на Петар Темелковски, а концерт одржа и квартетот „Мјузик прогресив“. Во Музејот за современа уметност во саботата во Рим беше презентирана изложбата „Синестезија“, чиј куратор е Викторија Васева-Димеска, а беше промовиран и зборникот „Славистички студии“.

Државната македонска делегација во саботата беше во Ватикан на аудиенција кај папата Бенедикт 16, а оствари средба и со државниот секретар на Светата столица, кардиналот Тарчисио Бертоне. Како што соопшти прес-службата на Собранието, на аудиенцијата кај папата Бенедикт 16, претседателот Велјаноски искажа длабока почит и благодарност за приемот, ги пренесе поздравите упатени од државниот врв на Република Македонија и го посочи значењето на пасторалната мисија на неговата светост, несебичното залагање за мир, солидарност и љубов меѓу сите народи, имајќи ги предвид сите искушенија и предизвици со кои светот се среќава. Неговата светост папата Бенедикт 16 на аудиенцијата изрази надеж за скоро решавање на спорот со името на Република Македонија и истакна дека секој има право да го користи сопственото име, се наведува во соопштението.

Чествување за сесловенските браќа имаше и во Русија, а го отворија рускиот патријарх Кирил и Вселенскиот патријарх Вартоломеј. Во Македонија, пак, немаше официјални празнични активности, а по повод 24 Мај, Денот на македонските и сесловенските просветители и учители, премиерот Никола Груевски во свое име и во име на Владата на Република Македонија упати честитка до македонските граѓани.

„Дозволете ми во мое лично име и во името на Владата на Република Македонија, да ви го честитам 24 Мај – Денот на македонските и сесловенските просветители и учители и да ви посакам радосни и благословени празнични денови. Епохалното и рамноапостолско дело на светите браќа Кирил и Методиј со децении останало да се празнува како еден од најголемите и најзначајните настани во историјата на човечката цивилизација. Нивната просветителска улога на културен и на религиозен план претставува порта низ која голем број народи влегоа и се издигнаа на угледно место во историјата на цивилизираниот свет. Како изумители на глаголицата и основоположници на словенската писменост, св. Кирил и Методиј докажаа дека не постои јазик што не е свет и достоен за славење на Бога и дека ние меѓу првите во Европа ја читаме Библијата на сопствениот јазик, се вели во честитката.

По повод Денот на македонските просветители свети Кирил и Методиј - 24 Мај,  во организација на литературното друштво „Браќа Миладиновци“ при црквата „Св. Климент Охридски“ во Торонто викендов се одржа 23. манифестација „Денови на македонската култура“.