Претходен број

Победа под истрага на УЕФА за лажирање на мечот со Пјуник

Причина дуелот во 2004 во кој Ерменците победија со 3:1 во квалификациите за ЛШ

Сашко Ѓ. Димовски

Двократниот македонски фудбалски првак, Победа, нејзиниот претседател и еден фудбалер се обвинети дека ги прекршиле принципите на интегритет и спортско однесување со манипулирање на конечен исход на меч во рамките на УЕФА со цел да стекнат предност за себе и трета страна. Ова вест вчера изутрина осамна на интернет страницата на Европската фудбалска федерација по дводневниот Конгрес на УЕФА во Копенхаген.

Мечот под истрага е оној на Победа против ерменски Пјуник во рамки на првото квалификациско коло во шампионската Лига на УЕФА на 13 јули во 2004 година. Сомнителен е првиот меч во Скопје во кој гостите славеа со 3:1 го головите на Манучарјан во 15 и 41 минута и Ховханисјан во 26 минута, почесниот погодок за прилепчани беше дело на Гешоски во 80 минута. Реваншот во Ереван заврши без победник - 1:1 и во следната рунда се пласира ерменскиот шампион.

Обвинението против Победа, нејзиниот прв човек, и еден фудбалер, се темели на извештаи прибрани од обложувалниците за вештачко кревање на коефициентот за односниот натпревар и изјави на неколку очевидци. Најавено е дека на 17 април по овој случај ќе се произнесе телото за внатрешна контрола и дисциплина при УЕФА. Овој орган се справува со дисциплински случаи како во теренот така и надвор од него и произлегува од статутот на УЕФА, правилата и одлуките на УЕФА кои не навлегуваат во компетенцијата на други комисии. Телото за внатрешна контрола и дисциплина може да донесе одлука за стопирање на процеси, повлекување на судска пресуда, пресуди и отфрлање или прифаќање на жалби и одлучува по прашањето дали се исполнети критериуми за прием и играње на клубовите во натпреварувањата под капа на УЕФА.

Периодот до 17 април е оставен за прибирање изјави. УЕФА вчера прати допис во ФФМ во кој ја задолжува нашата Федерација да обезбеди писмен извештај од фудбалскиот клуб Победа и нејзиниот претседател за расветлување на случајот. По обезбедувањето на изјавите и нивно праќање во Нион ќе следи и одлуката на Европската фудбалска асоцијација.

Победа е втор македонски клуб кој е на тапет на УЕФА. Во ситуацијата на прилепчани претходно беше и Македонија Ѓорче Петров. Кај ѓорчепетровци беа сомнителни резултатите во двомечот со бугарски Черноморе во второто коло во Интертото купот во 2007 година, но поради недостиг на докази беа ослободени од обвинението. Македонија Ѓ.П. беше елиминирана со вкупен резултат 7:0, во првиот меч во Скопје загуби со 4:0, во гости со 3:0.