Мартиноски елиминиран во второто коло во Анталија
Кратко траеше радоста на Илија Мартиноски по победата на кариерата против вториот носител и речиси 500 места повисоко рангиран чешки тенисер Адам Вејмелка, бидејќи доживеа елиминација веќе во второто коло на фјучерсот во Анталија, кој се игра на земјена подлога и за награден фонд од 10.000 американски долари. Квалификантот Мартиноски, кој неделава е 843. на АТП-листата во поединечна конкуренција освои само три гема против Мурад Инојатов (497.) од Узбекистан, кој славеше со 6-2, 6-1.
Дејвиса куп репрезентативецот на Македонија останува во турското летувалиште, каде што претстојниов викенд ќе настапи во квалификациите за третиот фјучерс едноподруго. (Р.Д.) |
