Поддршка за истрагата против Победа
Случајот против прилепчани е поведен по пријава на спортски новинари од Македонија
Претседателот на Фудбалската федерација на Македонија, Харалампие Хаџиристески, првиот човек на Победа, Александар Забрчанец-Ацуле и капитенот на прилепчани во дуелот со Пјуник, Николче Здравески, вчера беа најбараните луѓе. Нивните телефони „прегореа“ од звонење, а поштенските сандачиња беа преполни со СМС пораки. Хаџиристески вчераутро беше недостапен поради летот од Копехнаген, каде во изминатите два дена беше на годишниот Конгрес на УЕФА, но околу пладне успеавме да го добиеме. Го најдовме на аеродромот во Љубљана. Знаеше за што го бараме, па затоа почна самиот да зборува без да му поставиме прашање.
„Од Скопје ми јавија дека УЕФА пратила допис за активностите што ќе ги преземе во наредниот период против Победа. Ќе биде поведена истрага која ние како Федерација во целост ја поддржуваме и сакаме таа да биде комплетно завршена. ФФМ е надвор од постапката бидејќи ќе ја водат тела на УЕФА за натпревар што е под нејзината капа. УЕФА ќе реши по одлуката на дисциплинската комисија, а ние како Федерација локално ќе ги примениме препораките. За секој друг коментар во врска со овој случај е рано да се говори. Најпрво ќе го почекаме конечниот став на УЕФА“, беа првите зборови на Хаџиристески.
Тој е изненаден од случајот дека македонски клуб е под истрага на УЕФА поради сомнение дека е вмешан во лажирање на натпревар. Во Копенхаген никој ништо не и' соопштил на македонската фудбалска делегација. Покрај работниот дел на Конгресот, Хаџиристески и Костов имале и пријателски разговори и дружење со нивни колеги од некои од фудбалските федерации на стариот континент, но во ниту еден момент ова не добиле сигнал дека УЕФА презема нешто против наш клуб. Од Љубљана, Хаџиристески, веднаш стапи контакт со Австриецот Герхард Капел, човекот што беше делегат на мечот Победа - Пјуник во Скопје пред пет години и кој беше во придружба на челниците на ФФМ во данската престолнина во вторникот вечерта.
„Го замолив Капел да се јави во комисијата за внатрешна контрола и дисциплина во УЕФА и да ми каже за што всушност станува збор. Ми порача дека истрагата е поведена врз база на пријава на спортски новинари од Македонија кои ќе бидат повикани како сведоци за разветлување на случајот“, ни' порача Хаџиристески.
НиколЧе Здравески два дена е под лекарства
Екс капитенот на Победа и еден од фудбалерите при врвот во статистичките категории во домашниот фудбал, Николче Здравески, сега тренер на прилепскиот прволигаш, е згрозен што некои медиуми го поврзуваат него во наводно сомнителниот меч со Пјуник. Се оградува од случајот и категорично отфрла негова вмешаност во лажирање на дуелот со ерменскиот состав во квалификациите за Лигата на шампионите во 2004 година. Поради нарушена приватност, имиџ и реноме, како човек, играч и тренер, тој вчера поднесе приватни тужби против „Македонски спорт“ и ТВ Канал 5 плус, а поради непочитување на правото на презумција на невиност се додека не се докаже спортивното, Здравески, најави и тужби против посочените медиуми и пред Судот за човекови права во Стразбур.
„Два дена сум вознемирен и под лекарства, но нема да дозволам некој да го валка моето име и сето она што сум го направил за македонскиот фудбал. Ова се одразува и врз моето семејство и тренерска кариера. Имам три конкретни понуди да бидам тренер во клубови во Унгарија, Турција и Албанија. И оддеднаш моето име се споменува во негативен контекст“, коментира кормиларот на Победа, Николче Здравески.
„На што личат пишувањата дека ќе сум добиел доживотна суспензија, а притоа никој не побарал изјава од мене. Однапред да се осуди човек е недозволиво и надвор од секое нормално човечко поведение. Како може да се валка моето име и да се посочувам дека сум учествувал во лажирање кога јас играв само 20 минути во мечот со Пјуник и поради повреда на тетивата морав да ја напушам играта. На реваншот во Ереван воопшто не патував. Затоа ќе следат тужби против Македонски спорт и телевизијата Канал 5 плус, медиуми кои предвреме ме посочија како виновник во случај во кој не сум учествувал “, вели Здравески. (С.Д.) |
