Урнат сонот на „шпедитерите“ за прв шампион во БИБЛ
Рилски спортист во мечот за балканската титула во својот Самоков го совлада Фершпед Работнички со 84:77
Во израмнето финале, кое беше решено во последните две минути, Фершпед работнички не успеа да ја освои титулата во Балканската лига. Загуби од домашниот Рилски спортист, на македонскиот тренер Александар Тодоров, со 77:84.
Јунак на мечот беше Бранко Марковиќ, кој постигна девет од 10. поени на неговиот тим во финалните 120 секунди за конечен триумф.
Целиот натпревар беше во резултатска рамнотежа. Ниту една екипа не направи опиплива преднсот се до почетокот на последната четвртина, кога Рилски оствари серија од 11:2 за воство од 69:61, но и тогаш „шпедитерите“ соодветно возвратија, па бргу го израмнија резултатот на 72:72. Но во битните моменти „шпедитерите“ направија неколку грешки кои скапо ги чинеа. Најефикасни кај домаќините беше Папиќ со 19 коша, додека кај Ф.Работнички тоа беше Симиќ со 12. Но МВП на натпреварот беше Американецот од Рилски Тревис Петерсон, кој реализира 18 поени и 12 скока. Наедно тој беше и најдобар стрелец на целиот фајнл-фор турнир.
„Сакам да му честитам на Ф.Работнички за фер играта, како и наљ сите мои пријатели во Македонија. Секако честитки и за моите кошаркари, претседателот на клубот Петар Георгиев, кој ми даде шанса да работам со овие момчиња. Мечот беше тежок, одлучија неколку топки. Немаше да биде незаслужено и ако славеше Работнички. Ова е вистинска бајка за нас, бидејќи влеговме во натпреварувањето со вајлд карта, а сега сме шампиони“, изјави Александар Тодоров.
Неговиот колега од спротивната страна Марин Докузовски реално го коментираше севкупниот настап на Работнички сезонава во БИБЛ.
„Ако пред стартот на сезоната некој ми кажеше дека ќе играме финале во Балканската лига ќе бев среќен. Но, сега кога стигнавме до финалето нормално е дака посакувавме да станеме шампиони. Ако гледаме реално ова е успех за нас. Им честитам на кошаркарите на Рилски спортист. Играа со срце и на крајот победија. Сега ни преостанува борбата за титулата во домашниот шампионат. Во недела играме со Фени и немаме право на грешка“, потенцира Докузовски. |
