Од вчера комплетни во Амстердам, до мечот в среда 10 тренинзи
Горан Попов верува дека Македонија може да остане непоразена на „Амстердам арена“
Македонската фудбалска репрезентација вчера се комплетира во базата Сустдајнен во близина на Амстердам и ги започна подготовките за претстојниот дуел со Холандија во квалификациите за Светското првенство во Јужна Африка во 2010 година. На воведниот рапорт кај селекторот Среќко Катанец први се јавија играчите од домашното првенство, Даниел Мојсов (Македонија Ѓорче Петров), Вулнет Емини (Ренова), Јорде Георгиевски (Работнички) и Томе Пачовски (Вардар) плус интернационалците Стевица Ристиќ (Поханг Стилерс/Јужна Кореја), Горан Попов (Херенвен/Холандија), Горан Мазнов (Томск/Русија) и Николче Новески (Мајнц 05/Германија). Во текот на вчерашниот ден пристигнаа и останатите повикани репрезентативци за дуелот со „лалињата“, на Катанец од Скопје му се придружија и членовите на стручниот штаб, па националниот тим вчера попладне во буквално комплетен состав го одржа и премиерниот тренинг во хотелскиот комплекс во Сустдајнен, место оддалечено 40 километри од Амстердам.
„Во целост бев убеден дека можеме да го совладаме Ајакс во моето последно гостување на Амстердам арената со мојот Херенвен иако екипата за која настапувам во холандското првенство беше без триумф на тој стадион. Мојот инстинкт се оствари, победивме што претставуваше големо изнанедување, но не и за мене бидејќи верувам во квалитетите на моите соиграчи“, изјави Горан Попов, единствен „холанѓанец“ во националниот тим и дополни:
„Такво чувство ме обзема и сега. Се надевам дека и со репрезентацијата можеме да ја забележиме првата победа на Амстердам арена, но сепак, најважно е да не загубиме. Холандија е репрезентација од светски калибар, со планетарни ѕвезди. Тоа не треба д�� не' плаши туку треба да претставува мотив плус за нас. Поголем дел од фудбалерите во репрезентација веќе имаат играно на тревникот на Амстердам арена и ја имаат почувствивано величествената атмосфера. Во отсуство на Руд ван Нистелрој холандскиот напад не е на исто ниво меѓутоа не треба да не' залажува тоа. Мора да бидеме внимателни, да ја одржиме концентрацијата во текот на сите 90 минути, да ја играме нашата игра и малку среќа да обезбедиме поволен резултат“.
До дуелот во среда со почеток во 20.45 часот, нашата репрезентација ќе одработи вкупно 10 тренинзи. Вчера попладне имаше еден, од денеска до понеделник по два (10 часот наутро и 17 часот попладне). Последниот е планиран за вторник, единствен на „Амстердам арената“, во време на одигрување на натпреварот.
На први април Македонија и Холандија ќе ја имаат четвртата фудбалска пресметка. Во досегашните три „лалињата“ остварија една победа (есеноска во Скопје) со 2:1, останатите две завршија без победник во квалификаците за СП 2006 во Германија, во Скопје беше 2:2, во Амстердам 0:0. (С.Д.) |
