Малите хидроцентрали заглавија во хартии

„Енерџи Зотер Бау“ беше подготвена уште лани да почне да ја гради првата од 16 мали ХЕЦ

Маја Томиќ

Тешко се реализира инвестицијата на „Енерџи Зотер Бау“. Работите заглавија во административните процедури. Владата барала од компанијата дополнителни документи кои сега биле во процедура на обезб��дување. Така што се' уште нема ништо конкретно од кажаната инвестиција, иако лани во јули министерот за економија, Фатмир Бесими, со оваа австриска компанија го потпиша договорот за добивање концесија за 16 локации за изградба на мали хидроцентрали. Нивната вкупна моќност, според договорот, изнесува 6,62 мегавати, а е планирано просечно годишно производство на струја од 26,48 гигават-часа.

Претставникот на компанијата, Самоил Целески, пред една година изјави дека вредноста на инвестицијата е околу 15 милиони евра и информира дека фирмата е технички и финансиски подготвена веднаш да започне со изградбата. Притоа, според неговите зборови, првата од централите ќе биде пуштена со работа на почетокот на 2010 година.

Во средината на осмиот месец од годината се' уште ништо не се случува со инвестицијата и неизвесно е дали во наредните две години, до кога е крајниот рок, навистина ќе проработат сите договорени 16 централи на „Енерџи Зотер Бау“.

Во Министерството за економија велат дека не станува збор за пробивање на договорени рокови и дека за сите концесионери за мали ХЕЦ важи истото: во рок од три години од потпишувањето на договорот да се заврши со изградбата на централите и да започне производството на струја.

„Компанијата ’Енерџи Зотер Бау‘ е во завршна фаза на обезбедување на потребната документација за проектот. По препорака на Владата мораше да се направат извесни промени во техничкиот дел на списите, поради специфичностите на теренот каде што треба да се гради. Затоа се доцни со дел од документацијата. Но, за осум хидроцентрали оваа компанија веќе ги има комплетно потребните акти, одобрени од Владата. Како и да е, роковите во договорот се' уште не се пробиени“, вели Селвет Барути, портпаролка во Министерство за економија.

Од оваа институција појаснуваат дека од почетокот на годинава досега се потпишани 35 договори за концесии за мали хидроцентрали, доделени на првите три јавни огласи. Нивната вредност се проценува на 39 милиони евра. Станува збор за централи со вкупен капацитет од 21 мегават, а тие треба годишно да произведуваат вкупно 85 гигават-часа струја.

Моментно се врши евалуација на пристигнатите понуди од четвртиот јавен оглас за 32 мали ХЕЦ. Се очекува до крајот на септември да се донесат одлуките за доделување на концесиите, а во октомври и ноември треба да се потпишат и договорите. Сега се спроведуваат активности за објавување и на петтиот јавен оглас на кој треба да се дадат околу 50-60 локации за мали ХЕЦ, велат од Економија.