Калеников им објави војна на Азески и на Гошев

Дали НБМ е во спрега со банките и со големите фирми и дали зградата на СКМ е само на Азески, праша вчера Калеников

Соња Маџовска


Златко Калеников им објави војна на Бранко Азески и на Петар Гошев.

Во стилот на борба меѓу јунаците во детските приказни, како што се Снежана и седумте џуџиња и приказната за Мечката и медот, вчера Калеников го повика гувернерот Петар Гошев да каже јавно дали Народна банка на Македонија со години е во спрега со големите банкари и компании, кои не даваат да паднат каматите, бидејќи до кредити можат да дојдат само одбрани бизнисмени што се и членови на управните одбори во банките. На претседателот на Стопанската комора, Азески, Калеников отворено му објави војна за тоа чиј е имотот на Комората.

Калеников не запре тука. Тој упати остри стрели до големите банки, ги обвини за лихварско работење. „Мора да се стави крај на лихварството, бидејќи голем дел од банките се однесуваат како лихвари, а нас ни требаат пари од банките. Во овој момент во Македонија постои спрега во која официјално или не се шпекулира дека е влезена и Народна банка на Македонија. Ние немаме веќе крв и не знаеме што да правиме ако тоа не се прекине. Го повикувам Гошев да покаже дека не е во спрега со банките и големите фирми што не даваат малите фирми да се развиваат. Сакајќи или не, тоа е факт во Македонија. Големите фирми се во управните одбори на банките. Тие се и онака привилегирани со процесите на приватизација“, обвини вчера Калеников.

А за тоа кои се тие големи фирми, кои не даваат да му тргне на стопанството, според Калеников сами ќе се препознаеле во волшебното огледало на лошата кралица од приказната за Снежана. „Кој ќе се види во волшебното огледало, отворете весници и Интернет и видете кој од големите фирми се членови на управните одбори на банките. Тоа е невидлива спрега настаната од самобендисаност. Апелирам, тргнете ги волшебните огледала. Ова не е трка за најдобар бизнисмен“, повика Калеников.

Тој продолжувајќи со приказните, го смести претседателот на СКМ Азески во онаа со Мечката и медот. Според него, не можело само СКМ да го наследи имотот на поранешната Стопанска комора, која беше укината во 1996 година. „Зградата на Стопанската комора е на сите нас, бидејќи нашите родители одвојувале средства за да се изгради. Не може правен наследник да биде само СКМ, а ССК да нема сала за одржување на состаноци. Зградата е на државата, а не на СКМ затоа ги повикувам министрите за правда и за економија да се преиспита сопственоста“, рече Калеников.

На овој повик веднаш одговори министерот за финансии, Зоран Ставрески, кој рече дека веќе во владина процедура е новиот закон за коморите, но за Калеников и тоа не е доволно, бидејќи и во него не било регулирано прашањето на сопственоста. Тој смета дека големите компании го спречуваат развојот на малите фирми. „Се разбуди мечката и сака на малите фирми да им го земе медот што го заработиле. Голем дел од банките заедно со големите фирми ги кочат стопанството и економијата. Има многу мали и добри фирми и не може некој постојано да го кочи нивниот развој“, смета Калеников.