Илиевски лидер на Унион Олимпија против Будуќност во НЛБ-лигата

Во победата од 81:79 македонскиот кошаркар забележа 19 поени и по четири скока и асистенции

Кошаркарите на Унион Олимпија ја остварија шестата победа во регионалната НЛБ лига. Во Љубљана поразен тимот на Будуќност со 81:79, а во главна улога во домашниот состав беше нашиот Влатко Илиевски. На паркетот мина 35 минути и постигна 19 коша (2/7 за два поена, 1/6 за тројка и 12/13 слободни фрлања). Кон нив додаде и четири скока и исто толку асистенции. Најефикасен поединец на средбата беше гостинскиот играч, Владимир Мицов со 25 поени. По ова 14 коло Унион Олимпија се наоѓа на седмата позиција на табелата со 20 бода.

Победа во ова коло забележа уште еден тим со македонски интернационалец. Задар на Тодор Гечевски беше поуспешен во далматинското дерби во „Грипе“ против екипата на Сплит Кроација Осигурување со 91:83. Нашиот репрезентативец одигра 33 минути во дресот на задрани, уфрли 16 поени (6/9 за два поена, 4/4слободни фрлања) и оствари осум скока, три асистенции и една украдена топка. Покрај Гечевски по 16 коша за гостите постигнаа и Периќ и Стипчевиќ, најефикасен во победничкиот состав беше Бугаринот Иванов со 24 поени. Лидери во домашниот тим беа Штембергер со 26 коша и Шенон со 21. Во новата година Задар ќе влезе како петтопласирана екипа во НЛБ лигата со 20 бода.

ФМП Железник го доживеа деветтиот пораз сезонава во ова натпреварување. Клубот на Предраг Самарџиски загуби од Црвена звезда со 77:65. Самарџиски беше на паркетот 25 минути, постигна 14 коша (6/11 за два поена, 2/2 слободни фрлања), оствари 11 скока (4 дефанзивни, 7 офанзивни), подели две „банани“ и „украде“ една топка. И неговиот соиграч Драган Лабовиќ го заврши натпреварот со 14 поени, додека предводници на „црвено-белиет“ беа Едвард Лоренс Робертс со 18 поени и Лирој Анре Овенс со 17.

НЛБ лига, 14. коло



Резултати: Крка - Партизан 65:80, Босна АСА БХТ - Хелиос Домжале 87:72, Унион Олимпија - Будуќност 81:79, Цибона - Хемофарм 79:75, Сплит Кроација Осигурување - Задар 83:91, Војводина - Загреб 84:75, Црвена звезда - ФМП Железник 70:63.

Табела: Партизан 27, Црвена звезда 26, Хемофарм 25, Цибона 24, Задар 23, Будуќност 22, Унион Олимпија 20, Босна АСА БХТ 20, ФМП Железник 19, Сплит Кроација Осигурување 19, Војводина 18, Крка 18, Хелиос Домжале 17, Загреб Кроација Осигурување 16.