Промовирана Стратегијата за спречување на насилство во спортот

Фудбалската федерација на Македонија (ФФМ), вчера, ја промовира Стратегијата за спречување на насилство на фудбалските терени. Таа ќе опфаќа организирање на јавни трибини, изработка на рекламен материјал (плакати, флаери, печатење маички, капчиња, шалчиња со пораки против насилство), изготвување прирачници, компонирање на официјална химна за борба против насилство, едукативни семинари за спортските работници, работилници, а во план е воведување на еден час и во наставата во основните и средните училишта.

Овие активности ќе се спроведуваат во наредните две години со цел да ја променат и подигнат јавната свест, имплементација на постојниот Закон за насилство и недолично однесување на спортските терени и актите на ФИФА и УЕФА по тоа прашање.

Фудбалската федерација на Македонија заедно со останатите субјекти, невладини организации, Министерството за внатрешни работи (МВР), Агенцијата за млади и спорт (АМС) и училиштата се надева дека стратегијата, во иднина, ќе донесе резултати во намерите да му се застане на патот на недоличното и девијантно однесување на спортските натпревари. (С.Д.)