Бостон со нов клупски рекорд, Кливленд се' уште без пораз дома

Селтикси против Филаделфија (110:91) ја забележаа 19 победа во низа

Благодарение на беспрекорната тимска игра кошаркарите на Бостон ја совладаа Филаделфија, на домашен терен, со 110:91 што е нивна 19 победа во низа за нов клупски рекорд, а со вкупен скор од 27-2 „селтикси“ сега имаат и најдобар биланс во историјата на НБА лигата по 29 одиграни натпревари. Гарнет и Рондо уфрлија по 18 коша и беа најефикасни кај составот од „Бостон Гарден“, Марис Спејтс и Луис Вилијамс постигнаа по 16 за „седумдесетишестките“.

По синоќешниот празен репертоар во НБА, вечерва на програмата се пет меча, најинтересниот меѓу нив големото дерби во „Стејплс центар“, Бостон ќе и' гостува на екипата на Л.А. Лејкерс.

Кливленд останува непоразен тим на домашен терен сезонава. Кавалирси ја продолжија серијата од 14 меча без пораз, а најнова жртва на нивниот паркет беше составот на Хјустон кој беше совладан со 99:90. Воедно,за Кливленд ова е 24 триумф во оваа сезона. Предводник во тимот беше Леброн Џејмс со 27 коша и девет скока, најзабелержителни кај „ракетите“ беа Алстон со 20 поени и Јао Минг со ефект од 19 коша и пет скока.

Детроит славеше во соседското дерби против Чикаго со 104:98. Прво име кај пистонси беше Родни Стаки со 40 поени што е негов рекорд во кариерата.

Коби Брајант забележа 26 поени и шест скока во победата на Лос Анџелес Лејкерс над Њу Орлеанс со 100:87. Расположен за игра беше и Пау Гасол кој мечот го заврши со 20 коша и седум скока. За „езерџиите“ ова е втор триумф во низа, вкупно 23 сезонава.

Резултати: Атланта - Оклахома 99:88, Шарлот - Вашингтон 80:72, Кливленд - Хјустон 99:90, Индијана - Њу Џерси 107:108, Бостон - Филаделфија 110:91, Мајами - Голден Стејт 96:88, Детроит - Чикаго 104:98, Милвоки - Јута 94:86, Њу Орлеанс - Л.А. Лејкерс 87:100, Далас - Мемфис 100:82, Сан Антонио - Минесота 99:93, Портланд - Денвер 101:92.