„МАКФЕСТ“

Влатко Лозановски - најуспешен меѓу дебитантите

Младиот пејач Влатко Лозановски е најуспешниот дебитант во вечерта посветена на младите надежи на 23. издание на фестивалот на забавни мелодии „Макфест“, што се одржува од 9 до 11 октомври во Домот на културата „Ацо Шопов“ во Штип.

Лозановски освои најмногу гласови од публиката и од меѓународно турско-италијанско жири, благодарение на интерпретација на песната „Времето да застане“, чиј комплетен автор е Хари Котларовски. Второто место им припадна на „Патници“ и песната „Замисли“, додека како третопласирани завршија близнаците од бендот „Некст тајм“.

Наместо пет дебитанти, жири-комисијата одлучи да им даде шанса на шест млади надежи, меѓу кои се најдоа и Диме Петров, групата „Игуана“ и Емилија Гиевска.

Веднаш по дебитантската вечер, на сцената на „Макфест“ се одржа и првата полуфинална вечер, а виза за големото финале добија Дани и Влатко, Роберт Билбилов, Јоце Панов, Александра Пилева, „Игуана“, Моника и „Паркети“. По вчерашната втора полуфинална вечер на која настапија ДНК и Врчак, „Некст тајм“, „Патници“, Влатко Лозаноски, „Браво бенд“, Андријана Јаневска, Искра Трпева, Филип Јордановски, Мијата, Мартина, Ноне и Бојан Маровиќ, „Пумперс“, Стефан Величковски, Деана Николовска, Наташа Малинкова и Фани, денеска на ред е финалето на кое ќе биде познат победникот на 23. издание на „Макфест“.

Директен пренос од сите фестивалски вечери се емитува на првата програма на МТВ, а како водител стандардно ја гледаме Вера Јанковиќ.