Бензините поевтини за еден денар

Бензините од денеска се поевтини за еден денар, а цената на дизелот останува непроменета. Според одлуката на Регулаторната комисија за енергетика, малопродажната цена на еуросупер БС-95 ќе изнесува 68 денари за литар, а на еуросупер БС-98 ќе чини 69,5 денари. Се намалува и цената на екстра лесното масло за домаќинство за 0,5 денари и ќе се продава по 45,5 денари за литар. Малопродажната цена на мазутот М-1 НС, исто така, се намалува за 1,386 денари за килограм и ќе се продава по 31,479 денари.

Просечната цена на суровата нафта на светскиот пазар во изминатиот 14- дневен период изнесуваше 71,886 долари за барел и е за 4,28 отсто пониска од просечната цена на сурова нафта, по која беа формирани тековните цени на нафтените деривати. Курсот на денарот во однос на доларот во изминатиот 14-дневен период изнесуваше 50,0804 денари за долар и е за 1,28 отсто повисок од курсот на доларот по кој беа формирани цените. (Ек.Р.)