Расте обемот на стоковната размена, но и дефицитот

Стоковата размена покажува знаци на заживување, па нејзиниот обем во првите четири месеци од годинава е за 8 отсто поголем во однос на истиот период од 2009 година. Сепак, процесот на закрепнување на размената не е доволен за да го ублажи натрупувањето на трговскиот дефицит, кој од јануари до април достигна 670,6 милиони долари. Вкупната вредност на извозот на стоки од земјава изнесувала 897,5 милиони долари, а на увозот 1,56 милијарди долари. Покриеноста на увозот со извоз е 57,2 отсто.

Трговската размена по производи традиционално покажува дека во извозот е најголемо учеството на производите од железо и од челик (валани производи), облеката, фероникелот и преработките од нафта. Во увозот најмногу застапена останува суровата нафта, моторните возила за превоз на лица и електричната енергија.

Најголемо учество во извозот на стоки имаат земјите-членки на ЕУ и земјите од Западен Балкан, а во увозот на стоки најголемо учество имаат земјите-членки на ЕУ 27 отсто и земјите во развој.

Македонија најмногу тргува со Германија, Грција, Србија, Бугарија и Русија. (А.С.)