„Охи“ за полни резервоари во Грција

Сите транспортери што ќе влезат таму со повеќе бензин од дозволеното, ќе плаќаат плус половина евро за секој литар

Александрија Стевковска


Македонските транспортери почнаа да ги пресметуваат загубите, кои наскоро ќе почнат и да ги книжат поради ограничувањето што го воведе Грција за количината гориво, која камионите и автобусите можат да ја поседуваат при влез во земјата. Сите што ќе сакаат да влезат со повеќе бензин од дозволеното, ќе мора да плаќаат дополнителни давачки од половина евро за секој литар. Резервоарите на камионите и на автобусите грчките цариници ќе ги проверуваат на сите гранични премини.

Грција ја спроведува нафтената бариера за да ги натера превозниците таму да точат гориво, каде што еден литар се продава за 1 евро и 35 центи. Одлуката важи за транспортните возила од сите земји, но од неа се изземени патничките возила, бидејќи тие и не поседуваат големи резервоари за гориво. Македонската царина веќе е запозната со оваа последна одлука на Грција.

„Грција објави дека од денеска ќе биде дозволено камионите и автобусите да влегуваат во земјата со 200 литри гориво во резервоарите, а камионите со ладилници смеат да влезат со 300 литри гориво. Не е забрането резервоарот да има гориво над тие количини, но за секој литар гориво над дозволеното ќе се плаќаат дополнителни давачки“, вели првиот човек на македонската Царина, Ванчо Каргов.

Транспортерите се жалат дека оваа грчка одлука ќе предизвика нивни крах и дополнителни трошоци, кои тие нема да бидат во состојба да ги покријат.

„Влезот на камионите со помалку бензин од капацитетот на резервоарите ќе значи дека тие нема да можат да стигнат до крајната дестинација доколку не наполнат бензин во Грција. Тоа значи дека ако тука се полни бензин на почек, таму ќе треба веднаш да се плати и тоа по цена многу повисока од овдешната. Друг проблем е што таму има и недостиг од бензин, што би значело дека камионите може да останат без гориво на половина пат. Сето тоа ќе предизвика огромни финансиски загуби за сите транспортери“, вели Билјана Муратовска од „Макамтранс“.

Таа вели дека станува збор за нестандардна и вонредна мерка што ја вовела грчката влада за да се заштити себеси и одливот на пари, најмногу поради еуфоријата што ги зафати грчките возачи во последниот период резервоарите да ги полнат со бензин во Македонија поради пониската цена.

„Станува збор за нелојални мерки што ќе го дотепаат и онака опаднатиот промет на транспортерите, кои освен што возат за Грција, одеа и транзит низ таа земја откако претходно ќе ги наполнеа обичните и вградените резервоари во камионите. Сега наместо од 500 до 1.200 литри гориво, обичните камиони и автобусите ќе треба да влезат во Грција со 200 литри, а ладилниците со плус 150 литри, што е премалку за овој вид возила“, објаснува Муратовска.

Ограничувањето за внесот на гориво во резервоарите на камионите и автобусите наложено од грчката влада личи на слична мерка, која лани ја донесе Бугарија. „Лани ваквото ограничување што го воведе Бугарија траеше 7-8 месеци, со тоа што Бугарите беа поригорозни во одлуката и имаа дозволено внес на една количина гориво, без притоа да се прави разлика меѓу камиони со ладилник и без него“, објаснува Муратовска, според која, не доаѓа предвид воведување реципрочна мерка од наша страна, бидејќи тоа би требало да важи за сите земји и ќе значи ставање трн во здрава нога.

Грција е честа дестинација за камионските транспортери од Македонија.

Солун и Атина се редовни линии каде што се носи и се зема стока, но, сепак, домашните камионџии најмногу го користат јужниот сосед за транзит.

„Оваа најнова мерка на грчките власти ќе удри по нашиот џеб, бидејќи не можеме да ја поминеме Грција со двесте литри нафта. Ќе треба таму да точиме, а на нивните бензински пумпи нафтата е поскапа отколку што е кај нас и ете ни дополнителен проблем“, објаснува Борис Насков, превозник. „Не само што ќе ни се зголемат трошоците туку ќе ни се зголеми и одговорноста. Ќе треба однапред да планираме колку нафта ќе ни треба, кај треба да одиме и секако со нас треба и да носиме повеќе пари“, вели неговиот колега, Сашо Цветановски.

Во МНР не знаат за новата мерка на грчките власти, велејќи дека станува збор за одлука на ниво на царинските власти.

Во меѓународната практика вакви потези се преземаат кога една земја е во голема криза, што е случајот со Грција.

(Во изработката на текстот

учествуваше и дописникот од Струмица)