Северина

Би сакала да имам убав погреб

Хрватската ѕвезда наскоро издава ново ДВД од концертот во белградска „Арена“ и документарен филм „Кога ќе се претворам во Северина“

Хрватската ѕвезда Северина, која неодамна одржа спектакуларен концерт во Скопје, најавува ново ДВД-издание од концертот во белградска „Арена“, а заедно со него и документарен филм, кој го снимаше Дарко Дриновац - „Кога ќе се претворам во Северина“.

Во пресрет на новото издание Северина со хрватските медиуми ги подели новогодишните желби, за кои, како што вели, се мали и слатки. „Како подарок под елката оваа година би сакала да го добијам филмот ’Всушност љубов‘, зашто тоа е еден од моите најомилени филмови. Со задоволство го гледам за Божик. Си посакувам и парфем „ексентрик молекулс“ и книга од еден домашен писател“, вели Северина.

Вели дека се радува на пријателствата, а разделбите тешко и' паѓаат. „Има малку луѓе со кои сум се разделила, онака до крај. Можам да ги избројам на прсти. Тоа е тешко и болно“, вели пејачката, која на шега додава: „Би сакала да имам убав погреб, да ми дојдат сите луѓе што сум ги запознала“.

Таа ги прифаќа годините, не се претвора дека има 16, но ужива во животот толку како да има толку. Комплиментите дека денеска е поубава отколку со дваесет, ги прифаќа со смеење, но од 40 години не се плаши. „Всушност, им се радувам. Во триесеттите ми се случија многу работи. Многу посвесно ги проживеав 30-тите отколку 20-тите кога бев млада и немав поим за ништо. Кога со 20 години ќе го погледнеш небото, не е важно дали има облаци или сонце. Сега веќе мислам: „Никаков ден“, ако е облачно. Во 20-тите со задоволство се дотерував, сега сум си најубава по концертот, со размачкана шминка. Веројатно, затоа и толку настапувам“.