Дискриминираните ќе треба да си донесат и докази

Едно од најлошите решенија во Законот за заштита од дискриминација е тоа што товарот на докажување паѓа врз лицето што е дискриминирано, што е сосема погрешно. Со тоа што доказите за дискриминираност ги доставува оној што поведува постапка, се нарушува основниот принцип за заштита од дискриминација, незадоволни се од невладиниот сектор. Со ваквите забелешки не се согласуваат од Министерството за труд и социјална политика, кои велат дека нема место за забелешки, бидејќи Законот е донесен во соработка со граѓанскиот сектор.

„Каков што беше процесот на донесување на Законот, таков е и резултатот во однос на Комисијата за заштита од дискриминација. Најлошо од се' е тоа што ако граѓанин сака да поднесе претставка, треба да спроведе сопствена истрага и да донесе докази и факти дека бил дискриминиран. Со тоа е нарушен основниот принцип на заштита од дискриминација. Секаде во светот не докажува оној што е дискриминиран, туку оној што е пријавен за дискриминатор и тој треба да докаже дека е невин“, реагира Кочо Андоновски од Хелсиншкиот комитет. На вчерашната конференција за составот и структурата на Комисијата за заштита од дискриминација организирана од ОБСЕ и од Министерството за труд и социјална политика, тој забележа и дека ова тело нема да биде достапно за сите граѓани. Комисијата, освен во Скопје, нема да има регионални канцеларии, иако најголемата дискриминација се прави токму во помалите средини.

Со забелешките не се согласува министерот за труд и социјална политика, Џелал Бајрами.

„Не верувам дека би требало да има забелешки на начинот на избор на членовите на комисијата, затоа што и во Законот стои дека членовите на комисијата се избираат на тотално транспарентен начин и не верувам дека има добра причина за забелешки во тој дел“, вели министерот Бајрами. Поддршка доби и од претставникот на МТСП, Душко Миновски, кој вели дека комисијата ќе прави увид во фактичката состојба и во документацијата и ќе има обврска да го подготвува предметот за докажување.

Заменик-шефот на мисијата на ОБСЕ во земјава, Наталија Дрозд, истакна дека заштитата од дискриминација е едно од најважните човекови права и поради тоа е потребно не само законско решение туку и ефективна имплементација. Главната улога, нагласи Дрозд, ќе ја има токму Комисијата за заштита од дискриминација. (Св.У.)