Старите камиони не ги сака Европа

На вчерашната прелиминарно распределба на меѓународни транспортни дозволи - ЦЕМТ по електронски пат за 2011 година, учествуваа 678 фирми кои конкурираа за вкупно 1.114 ЦЕМТ-дозволи. Министерот за транспорт и врски, Миле Јанакиески, истакна дека успеале да обезбеди дополнителни контигенти од 9.450 транспортни дозволи за Србија, Хрватска, Турција, Црна Гора, Италија, Данска, Германија, Босна и Херцеговина и за Белгија. Но, намален е бројот на дозволи за Грција од 128 на 90 за идната година, што е, според Јанакиески, поради политика на таа земја.

Тој им порача на компании и на сопственици на товарни возила со ЕУРО 3 стандард да ги заменат со ЕУРО 5 возила. „Сите оние што поседуваат ЕУРО 3 возила, а сакаат да се занимаваат со меѓународен транспорт треба да купуваат возила со минимум ЕУРО 5, бидејќи времето ќе ги прегази и потоа колку и да сакаат да им обезбедиме меѓународни дозволи ќе биде многу тешко оти контингентот на дозволи се определува од страна на ЕК и на Меѓународното ЦЕМТ-здружение. Бројот на транспортни дозволи од година на година за ЕУРО 3 возилата се намалува и прашање на време е кога ќе се сведе на нула. Тогаш товарните возила со ЕУРО 3 ќе може да се возат само на територијата на Македонија“, истакна министерот Јанакиески. Според претседателот на „Макамтранс“, Билјана Муратовска, за 2011 се издадени 220 ЦЕМТ-дозволи повеќе. Таа укажа дека најдобра покриеност од над 96 проценти имаат компаниите кои во својот возен парк имаат возила со ЕУРО 5, или ЕУРО 4 стандард со што на оние фирми што инвестираат во нови возила многу брзо ќе им се повратат инвестициите. (Ек.Р.)