Во железничкиот сообраќај ќе се вложат 50 млн. евра

Владата го усвои нацрт-документот за потребите од инвестирање во „Македонски железници“ од околу 50 милиони евра за модернизација на возниот парк, од кои најголем дел се во делот на патничкиот сообраќај, односно за вагони за патниците и за локомотиви и мал дел инвестиции во товарниот сообраќај. „Таа анализа Владата ја усвои како нацрт на Министерството за транспорт и врски во соработка со Министерството за финансии и ќе започне комуникација со меѓународни финансиски институции да видиме дали тие ќе бидат заинтересирани да го помогнат овој процес, бидејќи самите сме свесни дека, пред се', патничките вагони се многу застарени, бидејќи последните 40-50 години воопшто не е инвестирано во нив“, порача вчера министерот за транспорт и врски, Миле Јанакиески. (МИА)