Секој може да направи грешка, смета Тодоров

Министерот за образование, Никола Тодоров, вчера изјави дека е човечки да се греши, но треба да се внимава да не се направи поголема штета.

Прашан дали поради чувството на одговорност за спорниот учебник по општество би поднел оставка, Тодоров одговори: „Во секоја работа има човечки фактор и оставена е можноста некој да згреши. Но, за среќа, не дозволивме оваа грешка да биде преточена во проблем за учениците и да направи поголема штета во образовниот систем. Одговорноста е една работа, вината е друга работа, а во целата оваа ситуација нема никаква вина ниту од Министерството за образование и наука, ниту од Националната комисија за учебници, ниту, пак, од Педагошката служба“.

Министерот соопшти дека новиот учебник по општество ќе биде готов ��о крајот на неделата. „Во тек е изработката на новиот учебник и извршена е суперрецензија. Вториот учебник ќе биде готов до крајот на оваа недела и ќе биде предаден на печатење, со цел да може да биде доставен до училиштата до започнувањето на учебната година. Во новиот тим се вклучени рецензенти кои имаат сериозни компетенции, искуства и знаење за да не дозволат да се случи ваква грешка во учебникот по општество, и тоа е клучниот фактор што не смее да затаи во целиот овој процес“, рече министерот. (О.В.)