ПОСЛЕДЕН ЗБОР

Данчо Трајковски



1963 – 2010, новинар

Нашиот колега, Данчо Трајковски, замина завчера на 47 години по кратко боледување. Замина тивко, но со јасна мисла и свесност, со збор на усните, како што му прилега на новинар, на вечен борец за вистината.

Трајковски беше новинар, пријател, другар, татко, а пред се', човек, чие име ќе остане длабоко врежано во аналите на прилепското и на македонското новинарство.

Се' уште се свежи спомените кога во 1986 година стана пионер во професијата со првиот извештај за спортски настан. Само по неколку месеци работа, како хонорарен новинар во тогашното Радио Прилеп, доби прва награда „Златна значка“ за посебен прилог, што ја доделуваше тогашната еснафска асоцијација на Македонија.

Својата професионалност ја вгради и во првата локална телевизија во Македонија - Телевизија Прилеп, од емитувањето на првиот сигнал пред 19 години. Гледачите и слушателите ќе го паметат по спонтаноста, по неверојатната способност без грешка да ги води емисиите во живо, без напишан текст.

Достоинствен и доследен на себе, секогаш кога постоеја закани, Данчо стоеше на фронтот, во одбрана на дигнитетот на новинарската професија. Остана простум и во времето и во невремето.

Остави белег во објективното, навремено и балансирано информирање и како постојан дописник на „Утрински весник“ од почетокот на издавањето, па до 2007 година, а во одреден период беше дописник и на радиомрежата Канал 77.

Драг колега, еве денеска вака, со пишан збор, се простуваме од тебе. Почивај во мир! (Мн.Т.)