| Клаус го повика Барак Обама да не ја поткопува пазарната економија
Њујорк - Помасовната државна интервенција и построгите регулативи ќе ја продолжат рецесијата, изјави чешкиот претседател Вацлав Клаус. Тој го повика американскиот претседател Барак Обама да не ја загрозува слободната пазарна економија, реагирајќи на тој начин на светската финансиска криза. Во обраќањето пред Колумбискиот универзитет во Њујорк, Клаус, поранешен чешки премиер и приврзаник на слободниот пазар, изјави дека тој лично никогаш не очекувал дека дваесет години по крахот на комунизмот повторно ќе стане сведок на толку голема државна интервенција, каква што ја набљудува денеска во целиот свет. „Убеден сум дека денеска нашата главна задача продолжува да биде битката за слобода и за слободен пазар“, за што отсекогаш сме ги ценеле САД, рече Клаус.
Тој изрази надеж дека новиот американски претседател нема да ги загрози основните институции и пазарната економија. Според него, економските проблеми не треба да се решаваат преку дополнителна владина интервенција.
Клаус изјави дека чешките банки останале незасегнати од финансиската криза, затоа што примениле многу претпазлива политика по азиската финансиска криза. (МИА) |
