Сопиште е против депонија за радиоактивен отпад
Од Дирекцијата за радијациона сигурност демантираат дека локација е веќе избрана
Општина Сопиште е прогласена за еколошки чиста општина и токму денеска го празнува Светскиот ден на животната средина
Општина Сопиште, дознавајќи од медиумите дека близу ловиштето „Јасен“ ќе се гради депонија за радиокативен отпад, категорично одбива да му се дозволи на оној што го наумил тоа и да го направи.
Советот на општината денеска за ова прашање има закажано вонредна седница на која ќе бидат донесени соодветни заклучоци.
Градоначалникот Љупчо Мицковски-Кец вчера нагласи дека Општина Сопиште е прогласена за еколошки чиста општина и токму денеска го празнува Светскиот ден на животната средина и нема да дозволи да се гради една ваква локација таму каде што е езерото „Козјак“, реката Треска и ловиштето „Јасен“, односно таму каде што има недопрен природен амбиент.
Од Дирекцијата за радијациона сигурност демантираат дека воопшто станува збор за веќе избрана локација во Општина Сопиште. Но, додаваат дека имаат задача да најдат локација која треба да биде склад за излачени извори. Тоа е, велат, неопходно за секоја држава и речиси сите бивши југословенски земји го имаат освен Македонија, која мора да се придржува кон членот 103 од Спогодбата за асоцијација и стабилизација.
„На Република Македонија и' се потребни 50 квадратни метри за наредните 100 години да ги депонира излачените извори, како што се громобраните. Нивно отстранување било планирано од 1986 година, но не е реализирано и сега тие повеќе дејствуваат штетно отколку што заштитуваат. Македонија има само привремени складишта на четири локации во приватни компании кои имаат дозволи за работа, но е чиста земја“, тврди Рубен Стаменов, директор на Дирекцијата за радијациона сигурност. (Сн.К.) |
