Убиство за долг од 100 евра пред очите на петгодишно девојче
Љубен Јошески (52) во кратка расправија го убил Петар Апостолоски (58) во неговиот двор
Моника Талеска
ПРИЛЕП - Педесет и осумгодишниот Петар Апостолоски од прилепското село Вранче е убиен вчера околу 10 часот во дворот од неговата куќа пред очите на петгодишната ќерка. Убиец е неговиот соселанец Љубен Јошески (52). Според полицијата, мотивот за убиството бил наводен долг од околу 100 евра, а злосторството се случило по краткотрајна расправија.
Според информациите, Јошески дошол во дворот на Апостолоски да го побара наводниот паричен долг. Со намера да го избрка, Апостолоски замавнал со летва кон Јошески. Тој му ја одзел летвата и се нафрлил врз него, удирајќи го неколку пати во пределот на главата. Притоа, му нанел тешки телесни повреди од кои Апостолоски починал на место.
Очевидец на настанот е единствено малата ќерка на убиениот, која веднаш била згрижена кај блиски роднини во Прилеп, зашто ова семејство неодамна од Скопје се вратило да живее во Вранче.
Соселаните се вознемирени од грозоморното убиство, кои велат дека Апостолоски и Јошески биле долгогодишни пријатели. „Ги знаеме за добри луѓе. Најверојатно се закарале за ситни пари и се случило најлошото“, вели Атанас Иваноски, жител на селото. Соселаните тврдат дека убиецот имал здравствени проблеми.
Откако еден од селаните го пријавил настанот, полицијата, истражен судија и заменик-обвинител извршиле увид на местото на настанот. Екипата на итна медицинска помош само констатирала смрт. „Причина за смртта се здобиените рани со тврд предмет во пределот на черепот и лицето. Телото на убиениот било пронајдени во локва крв во дворот од неговата куќа“, потврди д-р Гоце Јонзоски, началник на Службата за итна медицинска помош.
„Телото на починатиот е дадено на обдукција за да се утврдат причините за смртта. Убиецот е приведен и против него ќе биде поднесена кривична пријава за убиство“, соопшти Ѓоко Стрезовски, портпарол на СВР - Битола. |
