Притворени шверцери на илегалци во Германија
Завчерашното апсење на тројцата велешани и еден скопјанец, под сомнение дека се занимавале со трговија со луѓе и со шверц на мигранти, резултираше со изрекување мерка притвор, а за другите двајца куќен притвор.
Обвинителство поведе кривична истрага против Тунај Кариманов (27) од Велес, Сафет Асан (44) од скопската населба Шуто Оризари и против сограѓаните на првоосомничениот Горан Николчев (27) и Асан Махмудов (23). Oсомничени се илегално префрлале македонски државјани во Германија. Како организатор на групата Обвинителството го посочува Кариманов, кој за паричен износ од 2.500 евра за илегалец, обезбедувал транспорт на мигрантите и набавувал фалсификувани патни исправи и возила и возачи кои требале да ги пренесат патниците до договорената дестинација во Германија. За преправки на патни исправи Кариманов плаќал по 50, а за возилата и возачите давал и по 250 евра.
Кариманов уште во текот на минатиот месец го организирал илегалното патување на Себастијан Б. Имено, Кариманов најпрво обезбедил патна исправа за патникот, но на име на Џеват Неџиповски. За за замена на фотографијата, Кариманов му исплатил 50 евра на Сафет Асан, а потоа уште 500 евра за превозниците Горан Николчев и Асан Махмудов кои на 2 јуни околу 18 часот, со автомобил „БМВ 320 Д“ го презеле Себастијан Б. и кого требало да го превезат до Минхен, Германија. Патот им завршил на Табановце откако била откриена преправката на патната исправа.
Истражниот судија на Кериманов и на Николчев им одредил едномесечен притвор и куќен притвор за Сафет Асан и Асан Махмудов. (Љ.С.) |
