Санкциите со кои на американските компании им се забранува да инвестираат или да тргуваат со Иран се обновуваат годишно од 1995 година
ВАШИНГТОН - Американскиот претседател Барак Обама ги продолжи санкциите за Иран за една година, истакнувајќи дека Иран и натаму претставува закана за американската национална безбедност.
Во пораката до американскиот Конгрес, Обама рече дека Иран дејствувал спротивно на американските интереси во регионот. Санкциите, со кои на американските компании им се забранува да инвестираат или да тргуваат со Иран се обновуваат годишно од 1995 година.
САД стравуваат дека нуклеарната програма на Иран е покритие за производство на атомско оружје, но ирански официјални претставници го негираат тоа обвинение. Збогатениот ураниум може да се користи во нуклеарни централи, но, исто така, за производство на атомско оружје.
Иако администрацијата на Обама повторно ја разгледува политиката спрема Иран, непродолжување на санкциите би претставувало голема промена во однос на минатото, јави дописникот на Би-Би-Си во Стејт департментот во Вашингтон.
Иран се соочува со други меѓународни казнени мерки, меѓу кои три серии на санкции на ОН поради одбивањето да ги замрзне активностите за збогатување на ураниум. Американските санкции против Иран ќе истечеа без официјалното обновување на Обама. "Дејствувањата и политиката на владата на Иран се спротивни на интересите на САД во регионот, и претставуваат континуирана, невообичаена и вонредна закана", се вели во пораката на Обама до Конгресот.
Обама зборуваше за ангажирањето со Иран, но не објасни како би можело да се оствари тоа. Кусо време откако ја презеде функцијата во јануари, Обама рече дека "ако земјите како Иран се подготвени да ги разлабават нивните тупа��ици, ќе наидат на пружена рака од нас". (Би-Би-Си)
