Mинистерот ќе одлучи за екстерните тестови
До крајот на неделава се очекува Министерството за образование и наука да ги објави резултатите од екстерното тестирање, кое падна на Уставен суд, а со кое беа опфатени средношколци и основци, со цел да се оцени објективното оценување на наставниците. Но, за тоа како ќе бидат објавени овие резултати, кои беа најавувани за јули, ќе одлучи новиот министер за образование и наука, Никола Тодоров, кој деновиве ги поминува во запознавање со секторите во Министерството.
Тој вчера не знаеше да каже како ќе бидат објавени овие резултати, за кои додаде дека дополнително ќе се информира. Моментно, вели, се концентрирал на проектот за бесплатни учебници кои учениците треба да ги добијат од септември.
Директорката на Бирото за развој на образование и наука, Весна Хорватовиќ, вчера ни потврди дека анализата на тестовите, кои предизвикаа бурна реакција во јавноста, се при крај.
„Ги собравме сите тестови од училиштата и деновиве треба да излеземе со резултати од екстерното оценување, но ќе видиме во која форма ќе го објавиме, бидејќи анализата на овие резултати ќе биде за интерна употреба. Но, во секој случај, нема да ги ставиме децата и наставниците во непријатна положба“, вели Хорватовиќ, која додаде дека за објавувањето ќе одлучи новиот министер.
Моментно Министерството подготвува законски измени со кои повторно сака да го менаџира екстерното тестирање со тоа што тоа би поминало во рацете на Државниот испитен центар, сектор во Бирото за развој на образованието, кој ја спроведува државната матура. За Уставниот суд беше спорно тоа што државни органи, како што се Министерството и Просветниот инспекторат, го организираат и спроведуваат екстерното тестирање. Па, поради тоа, одлучи да ги укине овие тестови, со образложение дека тестирањето треба да го организираат училиштата. Но, по ваквите забелешки, ставот на Министерството беше дека немаат намера да се откажат од екстерното тестирање. Сега, со новите измени, повторно се предлага тестирањето да го води државен орган во рамките на Министерството. (Ж.Х.З.)
|
