„Некој сака да ми ја затвори устата“, обвинува градоначалникот на Чаир
Според Изет Меџити, апсењето на неговиот татко во акцијата во Фондот за ПИОМ е политички притисок
„Некој сака да ми ја затвори устата и да врши политички притисок врз мене“, обвини вчера чаирскиот градоначалник од редовите на ДУИ, Изет Меџити, остро реагирајќи на спектакуларното апсење на неговиот татко Беќир, кој е дел од групата осомничена за малверзации со пензии во Фондот за пензиско и социјално осигурување во Скопје. Градоначалникот на Чаир смета дека акцијата е дело на некои структури кои сакаат да ги извалкаат кадрите на ДУИ, а ваквите тврдења најавува дека наскоро ќе ги поткрепи и со факти. Изразувајќи сомнеж дека „тие што ја преземале акцијата можеби и немале цел да војуваат со корупцијата и организираниот криминал“, Меџити смета дека крајната цел е да се извалка тој и неговото семејство, со што ќе се извалка и неговиот политички профил. Од полицијата ги отфрлаат обвинувањата, додавајќи дека случајот е чист, поднесени се кривични пријави против десетмина и дека сега останува на судот да одлучи дали има основа да се гонат.
„Имам точни информации и од доверителни извори дека единствената причина за што на спектакуларен начин е приведен мојот татко од страна на полицијата е затоа што ми е татко и единствената цел на неговото јавно приведување е да ме извалкаат мене како политичар“, истакна Меџити на вчерашната прес-конференција во Општина Чаир.
Полицијата минатата недела спроведе обемна акција во Фондот за пензиско и инвалидско осигурување, при што беше приведена група, за која МВР има сознанија дека фалсификувала документи со цел издавање пензии на граѓани кои немале законско право на тоа. Според полицијата станува збор за добро организиран синџир, со кое раководело лице надвор од ПИОМ.
Од десеттемина приведени службеници во Фондот, четворица завршија во притвор, додека останатите беа пуштени, откако од страна на судот биле преземени мерки за обезбедување на нивното присуство. Меѓу нив беше и таткото не Меџити, вработен во ПИОМ, што беше осудено од страна на лидерот на Нова демократија, Имер Селмани. Тој обвини за „нееднакво применување на уставот и законите еднакво за сите граѓани“.
Но, Меџити е категоричен дека не сака да влијае врз судската постапка поврзана со неговиот татко, туку само да му даде одговор на јавниот суд, кој веднаш ги осудил приведените без судски епилог.
„Во скоро време сите овие нешта што ви ги напомнав ќе ги потврдам со факти и сите отворено ќе видат дека во оваа ��ржава некои структури постапуваат според принципот ’само компромитиран Албанец е употреблив Албанец‘. Во оваа држава се' уште има полициски структури кои се под влијание на различните политички движења и кои имаат цел да го компромитираат секој албански политичар за кого мислат дека е ризичен. Во последно време има круг политички полицајци кои прават се' да извалкаат повеќе кадри на ДУИ, зашто на некој начин сакаат да сведочат дека во оваа земја сите сме еднакво компромитирани“, обвини вчера Меџити. (Д.Т.) |
