Лекари ќе го спасуваат битолскиот разгранок на СДСМ
БИТОЛА - Тројца лекари од битолската Клиничка болница ќе го лекуваат битолскиот СДСМ од политичкиот колапс. Дијана Георѓиевска – кожен лекар, Олгица Николовска – неонатолог, и Зоран Лазаревски - специјалист по ургентна медицина, се само дел од списокот на кандидати предложени за локален лидер на социјалдемократите во Битола.
Аспирации да седнат во првата фотелја на Општинската организација пројавиле и ексминистерот за култура, Благоја Стефановски-Баге, поранешниот партиски секретар и бивш пратеник Борче Петковски, а на листата се запишал и битолскиот бизнисмен Васко Ковачевски, кој за многумина од партиското членство е анонимус.
Од партијата велат дека до последен момент се можни изненадувања, а името на новиот партиски лидер ќе се знае најдоцна за два дена. За да ја испита атмосферата во Битола и да се увери во кој ритам дишат сопартијците, во саботата на гости им дојде и старо-новиот лидер Бранко Црвенковски. Извори од партијата велат дека Црвенковски на средби со членството се задржал дури четири часа. И за нивно изненадување, иако очекувале да влијае околу изборот за идниот локален лидер, тој само стрпливо ги сослушал што мислат за предложените кадри и кој од нив би бил најдоброто решение за прв човек на Општинската организација.
Се' уште актуелниот претседател на СДСМ во Битола, Менде Диневски, вели дека за изборот на негов наследник се протежираат два концепта во партијата.
„Едни сметаат дека новиот лидер треба да биде човек кој досега бил инволвиран во сите структури на партијата, а пак други дека тоа треба да биде тотално нова личност, досега партиски неангажирана. Засега има повеќе кандидати, постапката се' уште е отворена, но се' ќе се знае за многу скоро“, вели пратеникот Диневски.
Познавачите на приликите коментираат дека секоја фракција во битолскиот СДСМ има свој кандидат.
Лекарката Георгиевска во изминатите години не беше партиски експонирана, но на последните локални избори единствено таа собра сили да се спротивстави на високиот рејтинг на градоначалникот на Битола, Владимир Талески. И за волја на вистината, Георгиевска на своето гласачко конто собра дури 2.000 гласа повеќе од предложената советничка листа на СДСМ во Битола. Неонатологот Николовска во кампањите се експонираше како остар критичар на лошото раководење на актуелниот директор на битолската болница заедно со нејзиниот колега Лазаревски, кој за време на раководењето на СДСМ беше директор на Здравствен дом - Битола.
Познавачите за ексминистерот Стефановски велат дека и покрај тоа што на последните локални избори се сметаше како најдоброто решение за кандидат за градоначалник, не се реши да ги измери силите со својот колега, актерот Талески. Но, затоа, пак, сега покажува подготвеност да седне во првата фотелја на партијата во Битола и да ги среди актуелните состојби.
Петковски многумина го именуваат како вечниот секретар на партијата, а сега коментираат дека, конечно, се охрабрил да стане и претседател. Тој беше втор човек на СДСМ во градот во времето на Златко Вршковски и Николче Ацевски. За Ковачевски единствено се знае дека води семеен бизнис и досега не бил инволвиран во структурите на партијата.
Она што на шега се зборува во седиштето на партијата е дека сите кандидати имаат силна желба да станат лидери, па лобираат во централата во Скопје не само по партиски, туку и по роднински и пријателски врски. (А.Б.) |
