Париз ги преспал случувањата во Тунис

ПАРИЗ - Францускиот дневен весник „Либерасион“ со наслов „Дисквалификувана“ побара оставка од министерката за надворешни работи Мишел-Алио Мари, бидејќи за време на масовните протести во Тунис предложила Франција да ги советува туниските безбедносни сили во одржувањето на редот.

Ни останатиот француски печат не е понежен со француската дипломатија, која остана во „магла и немоќ“ наспроти настаните во Тунис, каде што американската дипломатија се покажа многу повешта.

„Канар аншене“ пренесува една реченица што не е потврдена од страна на нејзиниот автор, министерот за одбрана Алан Жупе“: „Навистина е лудо да се дознае што се случува во една многу блиска земја слушајќи радио“.Според француските медиуми, францускиот амбасадор во Тунис, на самиот ден кога Бен Али побегна од Тунис, во телеграмата упатена до Елисејската палата и во МНР напишал дека „претседателот Бен Али ја држи ситуацијата под контрола“. Министерот за одбрана Алан Жупе во интервју се обидува да ја извлече француската дипломатија од оваа незгодна ситуација, објаснувајќи: „Без сомневање, ние го потценивме степенот на безнадежност на јавното мислење. Но, Франција останува верна на нејзините фундаментални принципи на нејзината надворешна политика: немешање во внатрешните работи на една суверена држава и поддршка на демократијата и слободата“. (МИА)