Претходен број

Побарана временска рамка и за преговорите за името

Доста се одложувања за Македонија, кажаа во вчерашната расправа европарламентарците

Од нашиот дописник
Слободанка Јовановска

Брисел - Европскиот парламент не им верува на аргументите на Европската комисија со кои и' го скрати датумот за преговори на Македонија, со речиси единствена порака дека по изборите во март околу ова прашање не смее да има повеќе одлагања.

Ова е главната вест од вчерашната дебата во ЕП, на која учествуваше и вицепремиерот за евроинтеграции, Ивица Боцевски, која беше одраз на расположението во политичките кругови иако, како што се покажа многупати досега, прашање е колку ќе влијае на одлуките на Европската комисија и на тие во Европскиот совет.

Како и да е, од расправата се виде дека и за европарламентарците станува апсурд четиригодишното чекање датум за преговори за Македонија, а за некои од нив апсурдни беа и критиките на ЕК во последниот извештај за прогресот на земјата, па беа окарактеризирани како претеран критицизам.

„Длабоко сум несреќен од работата на Советот поради ставот кон спорот за името и од Европската комисија поради годишниот извештај за прогресот“, започна германскиот парламентарец Берд Поселт. Нему најмногу му пречеа три нешта. „Не можам да се согласам со описот на изборите од страна на ЕК. Во 97 отсто од изборните места тие беа во согласност со европските стандарди, а само во мал дел од гласачките места на малцинствата имаше проблеми. Не можете поради нив да ја казните цела земја“, порача Поселт. Според него, исто така, неприфатливо е две третини од Македонците и Албанците во земјата да ја поддржуваат Владата, а таа да биде обвинувана од ЕК поради индивидуалци што го бојкотираат парламентот. Тој повика, исто така, да се поддржи енормната законска регулатива што се усвојува место да се нарушува тој процес со претерани критики.

„Нема причина да не почнат преговорите со Македонија“, го поддржа неговиот став и Ангелика Бер од групата на зелените, инсистирајќи дека Македонија чека не со години, туку со декади и дека е крајно време ЕУ да најде решение за спорот околу името. Таа сметаше дека е неуспех на ЕУ тоа што носи одлуки спротивни на меѓународното право и и' овозможува на националистичка Грција да го блокира напредокот на целиот регион.

Првпат во Брисел парламентарецот Јелко Кацин излезе со став дека преговорите за името не можат да траат вечно, а со тоа и блокадите за Македонија во ЕУ. „Кога зборуваме за Хрватска, употребуваме ’мора‘. Можеме ли конечно да кажеме колку треба да траат преговорите за името? Можеме ли да утврдиме некоја временска граница? Веќе три години е запрен прогресот на Македонија и тоа е премногу“, порача Кацин, додавајќи дека и' честита на власта за промените и пробивите во последните недели околу политичкиот дијалог со заклучок дека датумот за преговори не смее и натаму да биде проблем за земјата.

Грчките парламентарци главно се криеја зад европската реторика за добрососедство, потреба од силна демократија во Македонија, заеднички интерес да се постигне решение за спорот и слично, бидејќи климата не им одеше во прилог во ЕП. Освен еден, кој ја повика нашата Влада да се соочи со реалноста, бидејќи во извештајот стоело дека со години нема задоволителен прогрес во земјата, а ЕК не е грчка ниту прогрчка.

Известувачот за Македонија, Ерик Мејер, кој кратко го презентираше својот најнов извештај, повика повторно да и' се даде датум за преговори на Македонија, а спорот за името да се решава ако треба и отпосле. Секоја земја, според него, решава сама за името, но добро е ако овој пат двете земји најдат заедничко решение колку што е можно побргу, излегувајќи повторно со ставот дека Грција направила отстапка со тоа што прифатила воопшто да се спомне зборот Македонија. Во извештајот како основа за решение тој го посочи предлогот од 6 октомври, кој беше неприфатлив и за Македонија и за Грција.

Инаку, минатогодишниот извештај на Мејер претрпе толку измени што на крајот беше непрепознатлив, па мораше да биде повлечен и од расправа за да се смени уште еднаш поради блокадата околу спорот за името. „Кога ќе поминат изборите во 2009 година, мора да почнат преговорите. Веќе не смее да има пролонгирања“, повика Мејер од говорницата на ЕП. Хендикепот е што кога ќе се решава за тоа, овој состав на ЕП нема да биде во Брисел, бидејќи сите нив ги чека избори.

Кацин и Боцевски ја искористија говорницата да им одржат лекција по толеранција на грчките парламентарци, првиот нагласувајќи дека ќе зборува словенечки, што не го прави вообичаено, само за да изрази солидарност со македонскиот јазик, а вицепремиерот обраќајќи се на грчки со една реченица. На грчките пратеници тој им порача дека ЕУ има над 90 отсто поддршка во Македонија, бидејќи граѓаните гледаат на неа како на организација преку која ќе го заштитат националниот идентитет, зашто секогаш била инструмент на инклузивност со кој се премостуваат билатералните прашања.

На критиката дека Македонија не е подготвена за преговори со ЕУ, тој реплицираше со зборовите дека е обратно, дека државата има административен капацитет да ги почне веќе утре. „Целиот регион е подготвен да направи чекор напред. И не е подготвен само за нареден чекор туку за целосна интеграција во ЕУ. Дојде времето за тоа“, порача Боцевски, објаснувајќи дека заморот од проширувањето во ЕУ кај нас се преведува со зборот хипокризија. „Имало замореност или не, Македонија е цврсто решена да ги исполни барањата, бидејќи сегашната ситуација е неодржлива. Инциденти се случуваат во секоја земја. Важен е институционалниот одговор на нив“, рече тој, набројувајќи ги сите позитивни промени годинава на економски и на политички план. Притоа, се пофали со специфичниот мултиетнички модел во државата како најголем успех, посочувајќи дека во ЕП е придружуван од вицепремиер - Албанец, дека главен во Кабинетот му е Турчин и дека и самиот има делумно српско потекло.

Расправата во ЕП не ја следеше ниту еден грчки новинар, кои во континуитет ги игнорираат настапите на македонските функционери, бидејќи по се' изгледа им се доволни грчките и немаат волја да слушнат други аргументи.