Претходен број

Скопската епархија уплати за „Изгрев“, а ЛХБ бара стопирање на постапката

На 9 декември во Струга е закажана распределбата
на долгот, зашто хотелот трипати бил ставан под залог

Билјана Јовановска

Скопската епархија на Македонската православна црква уплати 1,5 милион евра, колку што бил проценет струшкиот хотел „Изгрев“ на лицитацијата, но прашање е дали ќе стане сопственик. На 9 декември, во канцеларијата на извршителот Марјан Деребан во Струга, каде што и се изврши јавното наддавање на кое Црквата била единствениот учесник и го купи хотелот по вторпат, треба да се одржи рочиште за распределба на 1,5 милион евра. Дали тоа и ќе се одржи и дали Црквата ќе го добие платениот хотел, зависи од многу работи. Зашто, „Изгрев“ бил ставен во залог трипати и за него е добиен кредит од 7,7 милиони евра, така што уплатените 1,5 милион евра без малку се смешни во однос на побарувањата.

ЛХБ банка преку својот адвокат Панче Нефтенов до Основниот суд во Струга поднесе барање за привремена мерка, која подразбира запирање на натамошното извршување на „Изгрев“, односно сопственоста на хотелот да не се пренесува на Скопската епархија и да не се изврши распределба на 1,5 милион евра додека не заврши судската постапка за поништување на заклучокот на извршителот Деребан за продажба на спорниот хотел. ЛХБ банка од судските органи бара утврдување на фалсификатот во имотниот лист 641 за „Изгрев“, од кој таа е избришана како доверител на кој „Миладинови ДОО“ му должи 5,2 милиона евра. Адвокатот на ЛХБ банка го оспорува и „редот на првенство во однос на другите доверители, бидејќи хотелот бил ставен под хипотека во 2005 година, кога на фирмата и' бил исплатен кредитот од 5,2 милиона евра“.

Во имотниот лист, за кој Нефтенов, застапник на ЛХБ банка, тврди дека „некој го фалсификувал и го избришал долгот кон оваа реномирана банка, за што е поднесена пријава против непознат сторител“, сега како доверители фигурираат Тутунска банка, во која „Миладинови ДОО“ со писмена согласност на врвот на Македонската православна црква го заложила „Изгрев“ за еден милион евра, и струшката фирма АВЕЛ ДОО, кон која има долг од 1,5 милион евра.

Фрапантно е како „Миладинови ДОО“ успеала трипати да го стави хотелот под залог, да добие кредити и заем од вкупно 7,7 милиони евра, а хотелот покрај толку пари да биде во фаза на распаѓање. Оттаму, логично се наметнува прашањето - каде завршиле овие милионски износи?

Да потсетиме, Македонската православна црква во 2001 година еднаш веќе го купи „Изгрев“ на Берза за 700.000 евра, но го изгуби со ставањето под залог. Минатата година, кога излегоа на виделина малверзациите со неког��ш ексклузивниот хотел, ама и деновиве бизнисмените Миладинови тврдат дека МПЦ немала никакво финансиско учество во купувањето на хотелот. „Само формалноправно МПЦ има една третина од ’Изгрев‘ и ништо повеќе, зашто парите за купување ги обезбедивме преку нашите фирми ’Кимико‘ и ’Кимико гардине‘, како и од банкарски средства“, изјави Ѓорѓи Миладинов, додека помладиот Димитар деновиве ни рече: „Факт е дека ’Изгрев‘ никогаш не бил во сопственост на МПЦ“. Архиепископот Стефан, пак, лани излезе со различни проценти за сопственичкиот удел на МПЦ во хотелот - од 51 до 59 отсто. Меѓутоа, иако изјавите се контрадикторни и, очигледно, некој не ја говори вистината, интересно е што Миладинови и сега имаат одлични релации со поглаварот Стефан. Кој кого штити и зошто, веројатно, ќе утврди истрагата.

Случајот со „Изгрев“ повторно го води обвинителката Гордана Гешковска и неофицијално се тврди дека тој ќе биде завршен до крајот на годината. Истражната постапка која потпаѓа под кривични дела за перење пари,

наводно, опфаќа дваесетина лица. Дека истражните органи работат „со полна пареа“ вчера потврди и државниот јавен обвинител Љупчо Шврговски.