Претходен број

Заврши штрајкот во училиштата

СОНК и Владата ги усогласија ставовите за синдикалните барања. Од денеска продолжува редованата настава

Web Update

22:37 02.12 - Раководството на СОНК и претставниците на Владата на средбата во Министерството за образование и наука го усогласиле текстот на Спогодбата и се договориле вечерва да бидат потпишани колективните договори за основно и средно образование.

Претседателот на СОНК, Дојчин Цветановски по неколкучасовната средба изјави дека вечерва на вонредната седница на Советот на СОНК со ресорните министри ќе бидат потпишани колективните договори за основно и средно образование. Цветановски очекува дека Советот на СОНК ќе донесе одлука за прекин на генералниот штрајк во образованието, науката и културата.

Ваквиот епилог следува по неколкучасовната средба на раководството на СОНК со министерите за образование и наука и за култура Перо Стојановски и Елизабета Канчевска - Милевска и заменик - министерот за труд и социјална политика, Спиро Ристовски. (МИА)

Текст од печатеното издание:

Жаклина Хаџи-Зафирова

Неизвесноста дали ќе се прекине штрајкот на просветарите, кој трае веќе втора недела, траеше вчера до доцните попладневни часови, кога пристигнаа информации дека синдикалниот лидер Дојчин Цветановски има закажана средба со министерот за образование и наука, Перо Стојановски. Претходно, Цветановски ја потврди оваа средба, истовремено најавувајќи дека по средбата со Стојановски ќе се одржи вонредна седница на СОНК за да им го пренесе договореното со ресорниот министер.

Додека се одбројуваа часовите до долгоочекуваната средба со претставници од Владата, се огласи и премиерот Груевски, кој ги замоли просветарите да почнат со наставата и да имаат разбирање за состојбата во која се наоѓа државата.

„Претседателот на Владата упатува апел за итен почеток на наставата во оние училишта во кои се' уште не е почната и ја потенцира определбата на Владата да продолжи да инвестира во образованието и во квалитетот на образовниот процес, бидејќи тоа е гаранција за успешна и просперитетна иднина на идните генерации и на државата“, стои во обраќањето на Груевски до просветарите. Премиерот ги осуди сите видови притисоци и обиди на партиите за манипулација со просветарите и обиди за политичка злоупотреба на нивните барања.

Синдикалниот лидер Цветановски вчера во изјава за медиумите не сакаше да ги потврди шпекулациите дека високиот владин претставник с�� кого тој се сретнал му понудил повисоки надоместоци за храна и превоз кои ќе почнат да се исплаќаат од 1 јули идната година, како и трансформација на работниот однос на наставниците од определено на неопределено време. Единствено кажа дека трансформацијата на работниот однос била претходно договорена, додека кај колективните договори е спорен финансискиот дел.

„Дефинитивно ќе има преговори меѓу претседателството на СОНК и трите ресорни министерства“, изјави вчера Цветановски, кој додаде дека состојбата со штрајкот и вчера била непроменета. Тој не сакаше да открие детали од понудата од Владата, но потенцира дека се' што ќе договори со Владата ќе биде ставено на хартија и ќе биде дел од спогодбата што ќе ја потпишат со Владата. „Поради тоа, закажавме и вонредна седница за да видиме што ќе произлезе од преговорите. Потоа ќе знаеме дали сме дошле до спогодба која ќе биде практично прекинување на штрајкот или повторно ќе се приближиме или оддалечиме од позициите што ги имаме“, им изјави синдикалниот лидер на новинарите непосредно пред средбата со Стојановски. До последен момент СОНК вчера ги собираше мислењата од синдикалните организации околу предлогот на Владата.

Тој оцени дека е оптимистички тоа што Владата ги напуштила тврдите позиции, иако не кажа кои се тие. Цветановски пред средбата беше оптимист дека Владата сериозно ќе ги разгледа нивните барања, бидејќи секое одолжување ќе ја комплицира ситуацијата.

Инаку, вчера повторно немаше класична настава во училиштата, каде што имаше само скратени часови. На училиште не доаѓаа сите деца, а нивното отсуство се забележуваше само од страна на некои професори.