Буџетска дупка од 67 милиони евра

Владата во март собрала 185,5 милиони евра, а потрошила 186,3 милиони евра, што значи дека во третиот месец од годинава имало само мал буџетски дефицит од околу 800 илјади евра. Но, ако се смета за првите три месеци од годинава, буџетскиот дефицит веќе достигна 67 милиони евра.

На веб-страницата на Министерството за финансии веќе не се објавуваат проектираните месечни приходи и расходи, како што беше практика во текот на минатата година, па не може јасно да се види дали во март имало потфрлање на буџетските приходи или пречекорување на буџетските расходи. Од Министерството за финансии вчера не беа достапни да дадат прецизни одговори на овие прашања.

Единствениот достапен податок се остварените приходи и расходи во март минатата година, што покажуваат дека лани во март биле остварени приходи од 196 милиони евра, што значи дека годинешниов март во однос на ланскиот има потфрлање од 10,5 милиони евра. (А.С.)