Пријавување даноци од компјутер

Граѓаните од следната година ќе можат по електронски пат да поднесуваат до Управата за јавни приходи годишни даночни пријави, како што го прават тоа големите, средните и малите даночни обврзници и самостојните вршители на дејноста. По електронски пат ќе ги добиваат и потврдите за платени даноци и за остварени приходи, а ќе имаат можност и за анонимно електронско пријавување неправилности со затајување данок и непрофесионално однесување на фирмите. Ова се приоритетни документи и активности во проектот за електронско оданочување, за чија имплементација вчера разговараа министерот за информатичко општество, Иво Ивановски, и Муједин Авдиќ, раководител на Секторот за услуги во УЈП.

„Во тек е набавка за нов систем за електронско оданочување. Набавката е почната пред еден месец. На економските оператори им останува уште еден месец да аплицираат со цел решението да биде реализирано до крајот на оваа година“, изјави вчера министерот Ивановски. (МИА)