„Павел Шатев“ контра „Надеж“

„Кабинетот постапи во согласност со Законот за пристап до информации, така што надлежните институции сега треба да постапат по она што е констатирано“, изјави вчера претседателот Ѓорге Иванов во врска со стратегијата „Надеж“, изработена за потребите на неговиот претходник, Бранко Црвенковски. Иванов рече дека не би го коментирал случајот „Надеж“, но „како и сите други е изненаден од содржината во таа стратегија“.

Вмровскиот институт „Павел Шатев“ вчера остро го нападна Црвенковски за стратегијата „Надеж“, во рамките на трибината „Политичката култура при практицирањето на власта“.

Претседателот на Институтот, Панде Лазаревски, рече дека не е неосновано да се праша „дали тоа не е оркестиран настап насочен кон дестабилизација на земјата, па дури, според некои стандарди, и подготовка за државен удар“. Според новинарот Миленко Неделковски, трошењето народни пари за политичка самопромоција и за совети е непримерно и непристојно. „Такво нешто нема никаде во цивилизираниот свет на кој сакаат да се повикуваат самонаречените интелектуалци. Бранко ги платил Словенците за да му дадат совети што се илјада страници глупости“, посочи тој.

Новинарот Драган Павловиќ-Латас рече дека немало разлика дали Црвенковски ги потрошил тие 340 илјади евра за годишен одмор или за купување скапи часовници. Според политикологот Владимир Божиновски, „Надеж“ не може да се разбере поинаку, освен како политичка кампања. Случајот, како што оцени Божиновски, потврдил дека Црвенковски „не бил претседател на сите граѓани, туку само на дел од нив, на оние што ја поддржувале неговата опција“. (П.Р.)